İranın İsrailə atdığı ballistik raketlərin sayı azalmağa davam edir. Dünən İsrail ərazisinə cəmi 10 raket atılıb. İlk günlə müqayisədə sonrakı günlərdə atılan raketlərin sayında ardıcıl azalma müşahidə olunur.

Bu, İsrailin bildirdiyi kimi raket buraxılış qurğularının sıradan çıxarılması ilə bağlıdır, yoxsa Tehranın mesajıdırmı?

Bununla bağlı millət vəkili Elman Nəsirov Sfera.az-a açıqlama verib.

O bildirib ki, iyun ayının 13-nə keçən gecə İsrail Müdafiə Qüvvələri İran İslam Respublikasının ərazisində genişmiqyaslı hərbi əməliyyatlara başlayıb:

“Əməliyyatın əsas məqsədi İranın nüvə infrastrukturlarını tamamilə sıradan çıxarmaqdır. Xüsusilə Natanz və Fordo kimi strateji obyektlər güclü zərbələrlə hədəfə alınıb. Bununla yanaşı, İranın yüksək vəzifəli şəxsləri, ordu generalları və nüvə sahəsində çalışan tanınmış alimlərin bir qismi də zərərsizləşdirilib. Müharibənin ilk anlarından etibarən ciddi hadisələr baş verib və qarşıdurmanın intensivliyi hələ də səngiməyib”. Müsahibimiz qeyd edib ki, İsrailin Baş naziri Benyamin Netanyahu bu vəziyyətlə bağlı açıqlamasında bildirib ki, qarşılarında duran məqsədlərdən biri İranın nüvə fəaliyyətini tam şəkildə dayandırmaqdır: “Digər məqsəd İranın ballistik raket istehsal imkanlarını tamamilə ləğv etməkdir. Üçüncü və daha dolayısı ilə ifadə olunan məqsəd isə ölkənin mövcud siyasi rejiminin dəyişdirilməsi arzusudur. Bu sonuncu hədəf açıq şəkildə dilləndirilməsə də, hadisələrin gedişatı bu niyyəti üzə çıxarır. Eyni zamanda, İsrail bu əməliyyatların nə qədər davam edəcəyinə dair konkret tarix göstərmir”.

E.Nəsirov bildirib ki, rəsmi açıqlamalarda vurğulanır ki, qarşıdurma məqsədlər reallaşanadək davam etdiriləcək:

“Buna cavab olaraq İran da yüzlərlə ballistik raket və pilotsuz uçuş aparatı ilə İsrailin müxtəlif şəhərlərinə zərbələr endirib. Bu hücumlar nəticəsində həm mülki obyektlər, həm də hərbi infrastruktur ciddi ziyan görüb. Bəzi müşahidələrə əsasən, İranın cavab tədbirlərinin miqyası azalmağa başlayıb. İsrailə yönələn raket zərbələrinin sayı ilə bağlı yayılan məlumatların azalması belə bir ehtimal doğurur ki, İsrail artıq İranın simvolik və strateji əhəmiyyətə malik qurumlarına – parlament binası, dövlət televiziyası, Daxili İşlər Nazirliyi və digər rəsmi strukturlara daha ağır zərbələr endirir”.

Deputat İran tərəfindən atılan raketlərin sayının azalması ilə bağlı iki əsas yanaşma mövcud olduğunu vurğulayıb:

“Birinci izaha görə, bu azalma realdır və raket hücumları həqiqətən də zəifləyib. Lakin bu versiya inandırıcı görünmür, çünki İran uzun illərdir belə bir müharibəyə hazırlıq görürdü. İkinci izaha əsasən isə, bu addım barış mesajı ola bilər. İran tərəfindən hücumların səviyyəsi bilərəkdən azaldılır və qarşı tərəfdən də oxşar jest gözlənilir. Üstəlik, İran artıq Birləşmiş Millətlərlə danışıqlara açıq olduğunu və nüvə proqramı ilə bağlı yeni bir razılaşmanın imzalanmasına hazır olduğunu bəyan edib. Buna baxmayaraq, İsrail tərəfi hələlik bu təklifə rəsmi cavab verməyib. Vəziyyət daha da gərginləşərsə, ABŞ-nin də bu münaqişəyə birbaşa müdaxilə etməsi ehtimal olunur. Hal-hazırda Vaşinqton aktiv iştirak göstərmir. Lakin əgər İran ABŞ vətəndaşlarına və ya obyektlərinə qarşı hücum təşkil edərsə, bu zaman Amerikanın hərbi cavab verməsi mümkün olar. Bu halda isə müharibənin coğrafiyası daha da genişlənə və münaqişə tamamilə yeni bir mərhələyə keçə bilər”.

Millət vəkili Azərbaycan tərəfinin də bu gərginlikdən dərin narahatlıq keçirdiyini bildirib. Onun sözlərinə görə, Xarici İşlər Nazirliyi tərəfindən verilən açıqlamada bildirilib ki, münaqişənin siyasi-diplomatik yollarla həll olunması, döyüşlərin dərhal dayandırılması və mülki əhaliyə qarşı hücumların təcili şəkildə kəsilməsi dəstəklənir:

“Azərbaycan üçün bölgədə təhlükəsizlik və sabitliyin qorunması əsas prioritetdir. Həmçinin, İran ərazisində yaşayan milyonlarla soydaşımızın taleyi bizim üçün xüsusi əhəmiyyət daşıyır. Bu səbəbdən, münaqişənin qısa zamanda nizama salınması, sülh prosesinin başlanması və İranın nüvə fəaliyyəti ilə bağlı yeni razılaşmanın imzalanması yönündə atılan bütün addımları dəstəkləyirik”.

Fidan Hacızadə

Sfera.az

İranın raket zərbələri azalıb: Barış gözlənilir?