Ukrayna Prezidenti Volodimir Zelenski ABŞ lideri Donald Trampla görüşdə ölkəsinin yeni silah paketi almasını müzakirə edəcəyinə ümid edir.

Ukrayna lideri Avstriya Prezidenti Aleksandr Van der Bellen ilə görüşün yekunu üzrə Vyanada keçirilən mətbuat konfransında bu barədə danışıb.

İndiki məqamda Tramp belə bir istəyi necə qarşılayacaq? Ümumiyyətlə, İsrail-İran müharibəsi fonunda ABŞ Rusiya-Ukrayna məsələsini bir qədər gözardı edə bilərmi?

Sfera.az-a bu barədə açıqlama verən politoloq Oqtay Qasımov Ukrayna tərəfinin hazırda ABŞ-dən dəstək gözlədiyini və bu yardımların hələlik davam etdirildiyini bildirib.

O qeyd edib ki, bunun əsas səbəbi isə Bayden administrasiyası dövründə qəbul olunmuş qərarlardır:

“Lakin yaxın aylarda bu dəstəyin davamı sual altına düşə bilər, çünki ABŞ-də kvota müddəti başa çatır və Donald Trampın bu məsələyə münasibəti hələlik qeyri-müəyyəndir. Böyük ehtimalla Tramp bu yardımları ya azaldacaq, ya da dəstəyi yalnız maddi qarşılıq müqabilində davam etdirməyə çalışacaq”.

Politoloq mövcud vəziyyətdə Ukraynanın qarşısında üç əsas yolun göründüyünü deyib:

“Qərb müttəfiqlərinin, xüsusilə də ABŞ-nin dəstəyini əvvəlki səviyyədə davam etdirməsi, Avropa ölkələrinin ayıracağı maliyyə resursları hesabına ABŞ silahlarının alınaraq müharibənin sürdürülməsi və Qərb dəstəyi ilə Ukraynada silah və hərbi texnika istehsal edən sənaye sahələrinin qurulması və bununla da Kiyevin hərbi ehtiyaclarının yerli istehsal hesabına ödənməsi.

Bunlar hələlik ehtimal səviyyəsindədir. Digər tərəfdən, beynəlxalq diqqət tədricən Rusiya–Ukrayna münaqişəsindən uzaqlaşaraq İran–İsrail gərginliyinə yönəlməkdədir. Bu kontekstdə Trampın Zelenskiyə müsbət yanaşması və əvvəlki dəstəyi davam etdirməsi ehtimalı olduqca zəif görünür”.

Fidan Hacızadə
Sfera.az

Trampla Zelenski görüşür - Qarşıda 3 YOL VAR...