İran-İsrail müharibəsi başlayır? - AÇIQLAMA
ABŞ rəsmiləri İsrailin İrana qarşı hərbi əməliyyat keçirməyə hazır olması barədə məlumat əldə ediblər.
Mənbələrin sözlərinə görə, amerikalı məmurlara İsrailin İrana qarşı hərbi əməliyyata başlamağa tam hazır olduğu barədə informasiya verilib.
Hazırda İran-İsrail müharibəsi nə dərəcədə real görünür? Hərbi toqquşma yaşanarsa, kənar müdaxilələr olacaqmı?
Sfera.az-a bu barədə açıqlama verən politoloq Elçin Xalidbəyli İsrailin İrana hərbi zərbələr endirmək üçün hazırlıqları yekunlaşdırdığını və artıq hər an hərəkətə keçməyə hazır olduqları barədə rəsmi bəyanatlar verildiyini bildirib.
Onun sözlərinə görə, bu məsələ təkcə İsrailin irəli apara biləcəyi bir məsələ deyil, çünki İsrail ABŞ-nin ən yaxın müttəfiqlərindəndir və atdığı bütün addımları da Vaşinqton ilə razılaşdırır:
“ABŞ-nin razılığı olmadan İsrailin İrana hərbi zərbə endirməsi o qədər də inandırıcı görünmür. Bəzi məlumatlara görə, Vaşinqton hazırda Tehranla müharibəyə başlamaqda maraqlı deyil. Çünki Ukrayna müharibəsi və onun ətrafında yaranmış gərgin vəziyyət Ağ Evdə ciddi narahatlıqla qarşılanır. Və belə bir mərhələdə ABŞ-nin İranla müharibədə maraqlı olmadığı aydındır. Lakin bu o demək deyil ki, İsrail ABŞ-nin bu məsələdə qərarverici olmayacağını düşünür. Ağ evdə də hesab edirlər ki, İranın nüvə proqramı ilə bağlı məsələ siyasi-diplomatik yollarla həll oluna bilər”.
Politoloq hərbi müdaxiləyə ehtiyac qalmaya biləcəyini vurğulayıb.
O qeyd edib ki, buna görə də İsrailin ABŞ-dən İranla bağlı hərbi zərbə üçün razılıq və razılaşma alması asan bir məsələ deyil:
“Əgər Ağ Ev razılıq verməzsə, İsrailin İrana qarşı hərbi addımlar atmağa cəhd göstərməsi də gözlənilmir. Bu baxımdan, indiki mərhələdə ABŞ-nin razılıq vermə ehtimalı yoxdur və bununla paralel olaraq İsrailin İrana hərbi zərbə endirmə ehtimalı da inandırıcı görünmür”.
Fidan Hacızadə
Sfera.az
