ABŞ siyasətində dəyişiklik edib: “Daha çox öz maraqlarını qoruyacaq”
ABŞ dövlət katibinin son açıqlaması ölkənin xarici siyasətində diqqətçəkən bir dəyişiklik kimi dəyərləndirilir. Rəsmi Vaşinqtonun ali diplomatı bildirib ki, bundan sonra ABŞ-nin xarici siyasətində əsas prioritet beynəlxalq nizam deyil, məhz ölkənin öz maraqları olacaq.
“Biz beynəlxalq nizam və ya dünya üçün nəyin xeyirli olduğuna əsaslanaraq dəfələrlə xarici siyasətdə qərarlar vermişik. İndi bizim xarici siyasətimizin birinci prioriteti ABŞ və ABŞ-nin maraqlarına cavab verən məsələlər olmalıdır”, – deyə dövlət katibi vurğulayıb.
Maraqlıdır, bu yanaşma hər zaman var idi, yoxsa yeni siyasətdir?
Mövzu ilə bağlı Sfera.az-a açıqlama verən siyasi şərhçi Mübariz Göyüşlü məsələni şərh edərək bildirib ki, bu yanaşma ABŞ-nin yeni xarici siyasət strategiyasını ortaya qoyur.
“Ümumiyyətlə, Amerikanın indiki administrasiyası başda Prezident Donald Tramp olmaqla xarici siyasətdə əvvəlki dövrlərdən fərqli yanaşma sərgiləyir. Hazırda ABŞ daha çox daxili siyasi və iqtisadi problemlərin həllinə yönəlmiş addımlar atır”, – deyə ekspert qeyd edib.
Onun sözlərinə görə, keçmişdə ABŞ beynəlxalq nizamın qorunması və qlobal proseslərdə fəallığı ilə seçilirdi. Lakin indi vəziyyət dəyişib və bu da məntiqi yanaşma kimi dəyərləndirilə bilər:
“Əvvəllər ABŞ beynəlxalq miqyasda fəaliyyətlərə önəm verirdi. İndi isə belə bir situasiya yaranıb ki, Amerikanın xarici siyasətində öz maraqlarına köklənməsi daha çox daxili iqtisadi, sosial və siyasi problemlərin həllinə xidmət edir. Bu isə məntiqlidir, çünki dövlət əvvəlcə öz problemlərini həll etməyə çalışır”.
M.Göyüşlünün fikrincə, bu yanaşma müəyyən qədər xarici siyasətdə dəyişiklik kimi də qəbul edilə bilər:
“Yeni administrasiyanın bu addımı xarici siyasətdə yeni bir yanaşma kimi qiymətləndirilə bilər. ABŞ artıq dünyada hər hansı bir böhran baş verəndə dərhal ordu yeritmək və ya iqtisadi yardım göstərmək əvəzinə, daha çox “Amerikanın problemi var və biz onu həll etməliyik” prinsipi ilə hərəkət edir. Yəni ABŞ indi daha çox öz maraqlarını qorumağa çalışır”.
Ekspert qeyd edir ki, bu siyasət dünyada ABŞ-nin rolu ilə bağlı yeni müzakirələrə yol açacaq və digər ölkələrin də öz xarici siyasətlərinə bu prizmadan baxmalarına səbəb ola bilər.
Bəsti Rəfizadə
Sfera.az
