Ərdoğan Bakı Enerji Həftəsinin açılışına müraciət ünvanladı

Türkiyə Prezidenti Rəcəb Tayyib Ərdoğan Azərbaycanın paytaxtı Bakıda keçirilən 30-cu Bakı Enerji Həftəsinin açılışına müraciət ünvanlayıb. 
 

Sfera.az “Haber Global”a istinadən xəbər verir ki, Prezidentin mesajını Türkiyənin enerji və təbii sərvətlər naziri Alparslan Bayraktar oxuyub. Ərdoğan mesajında Bakı Enerji Həftəsi çərçivəsində keçirilən tədbirlərin bölgə üçün, xüsusilə də Türkiyə və Azərbaycan kimi əzəli qardaş ölkələr üçün faydalı olmasını arzulayıb. O, iki ölkə arasında enerji sahəsindəki əməkdaşlığın güclü və qətiyyətli şəkildə davam etdiyini qeyd edib.

Türkiyə lideri bildirib ki, son illərdəki qlobal geosiyasi proseslər bu əməkdaşlığın enerji təhlükəsizliyi baxımından nə qədər vacib olduğunu bir daha göstərib. O, Bakı-Tbilisi-Ceyhan və Bakı-Tbilisi-Ərzurum boru kəmərlərinin bu sahədəki strateji əməkdaşlığın mühüm nəticələri olduğunu vurğulayıb.

Ərdoğan bu uğurların davamı olaraq mart ayında açılan İğdır-Naxçıvan boru kəmərinin önəmini qeyd edib və Türkiyə-Naxçıvan, eləcə də Türkiyə-Gürcüstan arasında əlaqələrin genişləndirilməsinin vacibliyinə diqqət çəkib.

O, Türkiyə-Azərbaycan, Gürcüstan və Bolqarıstan arasında “Yaşıl elektrik enerjisinin ötürülməsi və ticarəti üzrə əməkdaşlıq haqqında Anlaşma Memorandumu”nun imzalandığını xatırladaraq, bu layihənin bölgənin enerji təhlükəsizliyi üçün növbəti addım olacağını bildirib.

Ərdoğan həmçinin Azərbaycanın uzun illərdir həm Türkiyəyə, həm də Avropaya qaz ixrac etdiyini və hazırkı qlobal enerji bazarında mühüm strateji rola malik olduğunu vurğulayıb.

Türkiyə prezidenti Türkmən qazının Azərbaycan və Türkiyə üzərindən ixracı sahəsində əməkdaşlıq üçün böyük potensialın mövcud olduğunu deyib. Sonda o, Laçında Prezident İlham Əliyevlə keçirdiyi son görüşü xatırladaraq, Azərbaycan Prezidentinə və tədbir iştirakçılarına səmimi salamlarını çatdırıb və Bakı Enerji Həftəsinin uğurla keçməsini arzulayıb.

Fidan Hacızadə
Sfera.az