Cənubi Qafqazda geosiyasi axarlar dəyişir - Bunu edən 3 ölkənin müttəfiqliyidir

Azərbaycan Prezidenti İlham Əliyev, Türkiyə Prezidenti Rəcəb Tayyib Ərdoğan və Pakistanın Baş naziri Məhəmməd Şahbaz Şərifin Laçında birgə bəyanatlar verib. Bəyanatlar yalnız öz ölkələrinin regional və qlobal problemlərə dair mövqelərini bölüşməkdən ibarət olmayıb, həm də üçtərəfli bir siyasətin qətiyyətli elanını təşkil edir. Bu ittifaq, dünya nizamında zərərli təsirlər yaradan hökmranlıqlara qarşı tutarlı və prinsipial bir mövqenin təcəssümüdür.

Sfera.az xəbər verir ki, bu haqda Aqşin Kərimov açıqlama verib.

O bildirib ki, Azərbaycan-Türkiyə-Pakistan ittifaqının yüksəlməsi, regiondakı süni geosiyasi axarları dəyişdirmək və qlobal idarəetmə institutlarının hegemonluğunu neytrallaşdırmaq üçün müdafiə strategiyasını vurğulayır:

"Yəni Bakı-Ankara-İslamabad üçbucağı təkcə bir bölgənin, yəni Cənubi Qafqazın deyil, ümumilikdə Avrasiya geosiyasətində əsas rolları qeyd edən bir platformaya çevrilir. Bu, həm də gələcəkdəki təhdidlərə qarşı Azərbaycanın işğaldan azad edilmiş əraziləri, o cümlədən Şərqi Zəngəzur bölgəsi üzrə Azərbaycanın, Türkiyənin və Pakistanın hərbi səylərinin koordinasiyasına işarə edir. Əgər bu bölgələrdə hər hansı bir təhdid yaranarsa, Bakı-Ankara-İslamabad müttəfiqliyinin hərbi komponentləri döyüş əməliyyatlarında öz performansını göstərəcək”.

Politoloq dedi ki, Pakistanın Baş naziri Məhəmməd Şahbaz Şərifin Laçına ölkəsinin hava qüvvələrinin təyyarəsi ilə gəlişi, bu əməkdaşlığın hərbi sahədəki dərinliyini və real təhlükə qarşısında birgə mübarizə hazırlığını göstərir:

"Regiondakı əməkdaşlıq modellərində iştirak etmək istəyən güclər, Azərbaycan-Türkiyə-Pakistan strateji kitabından səhifələr götürmək məcburiyyətindədir. Üstəlik, hər üç ölkənin Çinlə yüksələn əlaqələri, yeni qlobal nizamın yaranması fonunda çeviklik və preventiv tədbirləri gücləndirən mexanizm yaradır”.

Ekspertin sözlərinə görə, Bakı-Türkiyə-İslamabad əməkdaşlığı, regionda ambisiyaları məhdudlaşdıran və qlobal geosiyasi rəqabəti balanslaşdıran əhəmiyyətə malikdir. Bu ittifaqın gələcəkdə daha geniş regional və beynəlxalq inteqrasiya üçün zəmin yarada biləcəyini vurğulayan Kərimov əməkdaşlığın digər dövlətlər tərəfindən maraqla izlənəcəyini bildirib.

“Azərbaycan-Türkiyə-Pakistan müttəfiqliyi Avrasiya geosiyasətini formalaşdıran Böyük Britaniya və Çinin diqqət mərkəzinə düşərək, yeni əməkdaşlıqlar üçün formulları stimullaşdıracaq” , – deyə Aqşin Kərimov əlavə edib.

Bəsti Rəfizadə
Sfera.az