Fransanın Ermənistanın cənub bölgəsi olan Zəngəzurda konsulluq açması regionda yeni geosiyasi proseslərin başlandığını göstərir. Ekspertlərin fikrincə, bu addım, "Zəngəzur" dəhlizinə gələcəkdə nəzarət etmək planının tərkib hissəsidir və Ermənistanın Rusiyanın bölgədəki təsirini zəiflətmək məqsədi güdür. Son zamanlar Ermənistan Rusiyanın hərbi varlığını azaldaraq, Fransa ilə əlaqələri gücləndirir.

Sfera.az xəbər verir ki, politoloq Məhəmməd Əsədullazadə hesab edir ki, Fransanın bu addımı təsadüfi deyil və daha geniş planın tərkib hissəsi kimi qiymətləndirilməlidir.

Ekspert bildirir ki, Fransa Zəngəzur dəhlizinə gələcəkdə nəzarət etmək niyyətindədir və bu istiqamətdə Ermənistanla əməkdaşlığını gücləndirir.

M.Əsədullazadə qeyd edib ki, Ermənistan bu yolla Rusiyanı regiondan sıxışdırmaq istəyir:

"Məhz bu səbəbdən Ermənistan son vaxtlar bir sıra addımlar atıb. İranla sərhəddə yerləşən Rusiya hərbçilərini geri çəkib, Azərbaycanla şərti sərhəddə - Zəngilan istiqamətində isə Rusiya hərbi postunu ləğv edib. Bu proses açıq şəkildə göstərir ki, Ermənistan artıq Rusiyanı deyil, Fransanı regiona gətirmək istəyir”.

Ekspert ehtimal edir ki, yaxın gələcəkdə Fransa bölgəyə məhdud sayda hərbi kontingent də yerləşdirə bilər:

"Bu isə Rusiya ilə yeni qarşıdurma mərhələsinin başlanğıcı ola bilər. Rusiya Müdafiə Nazirliyi Ermənistanın bu siyasətindən narazılığını ifadə edib və Fransanı Cənubi Qafqazda təsir dairəsini genişləndirməyə çalışmaqda ittiham edib. Zəngəzura nəzarət uğrunda Rusiya və Fransa arasında geosiyasi maraqlar toqquşur. Paşinyan isə seçimində Fransaya üstünlük verir. Azərbaycan bu prosesləri diqqətlə izləməli və Ermənistana xarici hərbi kontingentin Zəngəzura gətirilməsi ilə bağlı ciddi xəbərdarlıq etməlidir”.

Bəsti Rəfizadə
Sfera.az

Zəngəzur uğrunda mübarizə güclənir - Fransa tədricən regiona yerləşir