Rusiya Prezidenti Vladimir Putin, ABŞ-nin təklif etdiyi 30 günlük atəşkəs planını prinsipcə dəstəklədiyini, lakin bu planın həyata keçirilməsi üçün bir sıra şərtlərin yerinə yetirilməsinin vacib olduğunu bildirib. Putin, atəşkəsin yalnız münaqişənin əsas səbəblərinin aradan qaldırılması və uzunmüddətli sülhə gətirib çıxaracağı təqdirdə mümkün olduğunu vurğulayıb .

Belə olan halda nə baş verməlidir ki, tərəflər atəşkəsə razı olsun?

Sfera.az-a bu barədə açıqlama verən politoloq Natiq Miri bunun Vladimir Putinin bir siyasi manevri olduğunu deyib.

Politoloq bildirib ki, o, müharibəni dayandırmaq niyyətində deyil:

“Sadəcə olaraq, ABŞ və onun Prezidenti Donald Trampı qıcıqlandırmamaq üçün prosesi manipulyasiya edir. Əvvəlcə İstanbulda heç bir şərt irəli sürmədən birbaşa Ukrayna-Rusiya danışıqlarının mümkünlüyü gündəmə gətirildi. Lakin daha sonra Zelenskinin təşəbbüsü ilə iki dövlət başçısının görüşü təxirə salındı. Bu müddət ərzində aparılan danışıqlardan heç bir real nəticə əldə olunmadı. Əksinə, Rusiya tərəfi yenidən maksimalist tələblər irəli sürdü və Ukraynanı təhdid edərək təzyiqləri artırdı.

Hətta Rusiya və ABŞ prezidentləri arasında baş tutan telefon danışığı zamanı belə, Kremlin atəşkəs və müharibəyə son qoymaqla bağlı konkret niyyətinin olmadığı açıq şəkildə hiss olunurdu”.

Müsahibimiz bu səbəbdən Donald Tramp da prosesin dalana dirəndiyini anlayaraq məsələni başqa platformalara yönəltməyə çalışdığını qeyd edib:

“Bir tərəfdən Papanın vasitəçiliyindən söz açır, digər tərəfdən isə məsuliyyəti Avropa İttifaqının üzərinə qoymağa cəhd edir. Bu yanaşma da Trampın yaxın gələcəkdə sülhün əldə olunacağına inanmadığını, sadəcə bunu açıq şəkildə bəyan etmək istəmədiyini göstərir. ABŞ prosesdən uzaqlaşaraq məsuliyyəti digər geosiyasi güclərə ötürmək niyyətindədir. Qeyd etmək lazımdır ki, Vladimir Putinin hakimiyyətdə qalmasının və mövcudluğunu qorumağının əsas səbəbi məhz müharibədir. Xüsusilə də yay əməliyyatları yekunlaşmadan və Rusiya ordusu hərbi üstünlük, yeni işğallar şəklində konkret nəticələr əldə etmədən, Putin sülhə razılıq verməyəcək. Baxmayaraq ki, Rusiyanın iqtisadi imkanları bu müharibəni uzunmüddətli şəkildə davam etdirməyə kifayət etmir, yenə də ən azı qış mövsümünə qədər Kremlin resursları bu gedişatı saxlamağa imkan verir. Bu səbəbdən də yay əməliyyatlarının payıza qədər uzadılması və daha çox ərazi qazanmaq Putinin əsas məqsədidir”.

N.Miri vurğulayıb ki, bu baxımdan, yaxın gələcəkdə tərəflərin bir-birinə memorandum layihələri təqdim etməsi, danışıqların aparılması və atəşkəsin əldə olunması barədə səsləndirilən fikirlər, əslində, zaman qazanmaq üçün ortaya atılmış illüziyalardır:

“ABŞ rəhbərliyi də artıq bu gedişləri dərk edib. Ona görə də müharibənin tezliklə başa çatacağını düşünənlər yanılırlar. Bu, sadəlövh arzudan başqa bir şey deyil. Müharibənin bitməsi üçün Rusiya tam şəkildə gücdən düşməli, həm hərbi, həm də iqtisadi baxımdan tükənməlidir. Hazırda isə belə bir vəziyyət yoxdur. Moskvanın hələ də müəyyən qədər resursları mövcuddur. Bu da o deməkdir ki, müharibə hələ bir müddət davam edəcək".

O bildirib ki, son Ukrayna-Rusiya danışıqlarında yəni İstanbul görüşündə Rusiya nümayəndə heyəti 21 il davam etmiş Şimal müharibəsindən bəhs edib:

“Həmin münaqişə yalnız 1721-ci ildə imzalanmış Niştad sülhü ilə başa çatmışdı. Bu mesajla Rusiya bu qarşıdurmanın uzun illər davam edə biləcəyini ifadə edərək, Ukraynanı dolayısı ilə qorxutmağa çalışır. Bu reallıq fonunda sülhdən danışmaq hələlik əsassız görünür. Ən azından yaxın aylarda, yəni qışa qədər bu müharibənin davam edəcəyini düşünürəm”.

Fidan Hacızadə
Sfera.az

"Tramp müharibəni başqa güclərə ötürmək istəyir" - ŞƏRH