İranın lideri Ayətullah Əli Xamenei ABŞ Prezidenti Donald Trampın regionda sülh çağırışlarına sərt reaksiya verib.

Sfera.az “Reuters”ə istinadən xəbər verir ki, o, Trampı yalan danışmaqda ittiham edərək, ABŞ-nin əslində İsrailə “10 tonluq bombaları Qəzzadakı uşaqların başına atmaq üçün” verdiyini bildirib.

Xamenei bu çıxışı Tehrandakı dini mərkəzdə keçirilən tədbirdə edib və bildirib: “Şübhəsiz ki, bu regionda korrupsiya, müharibə və münaqişənin mənbəyi sionist rejimdir və kökü kəsiləcək”.

Tramp isə Körfəz səfəri zamanı cümə günü Birləşmiş Ərəb Əmirliklərini tərk etdikdən sonra Air Force One təyyarəsində jurnalistlərə deyib ki, İran nüvə proqramı ilə bağlı ABŞ-nin təklifi üzərində sürətlə hərəkət etməli, əks halda “pis bir şey olacaq”.

Onun sözlərinə görə, Xamenei “cavab verməyə belə dəyməz.

“Onlar Amerika xalqı üçün biabırçılıqdır”, – Tramp əlavə edib.

İran prezidenti Məsud Pezeşkian bu gün bildirib ki, Tramp sülhdən danışır, eyni zamanda təhdidlər edir.

“Hansına inanmalıyıq?” – deyə Pezeşkian Tehranda dəniz tədbirində çıxış edib. O, “bir tərəfdən sülhdən danışır, digər tərəfdən isə ən qabaqcıl kütləvi qırğın vasitələri ilə hədələyir”.

Pezeşkian əlavə edib ki, Tehran İran-ABŞ arasında davam edən nüvə danışıqlarına baxmayaraq təhdidlərdən qorxmur və “biz müharibə axtarmırıq”.

Tramp cümə günü İranın nüvə proqramı ilə bağlı ABŞ-nin təklifi olduğunu desə də, İranın xarici işlər naziri Abbas Əraqçi X səhifəsində yazıb ki, Tehran belə bir təklif almayıb: “Heç bir ssenari yoxdur ki, İran dinc məqsədlər üçün zəhmətlə qazandığı (uranın) zənginləşdirilməsi hüququndan imtina etsin”.

Əraqçi xəbərdarlıq edib ki, Vaşinqtonun davamlı mövqe dəyişməsi nüvə danışıqlarını uzadır.

“Amerikanın dəfələrlə prosesi uzadan danışıqlar üçün yeni çərçivə müəyyən etməsi qətiyyən qəbuledilməzdir”, – deyə o vurğulayıb.

Pezeşkian bildirib ki, İran “qanuni hüquqlarından geri çəkilməyəcək”.

“Biz zorakılığa boyun əyməkdən imtina etdiyimiz üçün bölgədə qeyri-sabitliyin mənbəyi olduğumuzu deyirlər”, – o əlavə edib.

Xatırladaq ki, İran-ABŞ arasında dördüncü raund nüvə danışıqları ötən bazar günü Oman Sultanlığında başa çatıb. Yeni turun tarixi hələ müəyyən edilməyib.

Fidan Hacızadə
Sfera.az

Xamenei Trampı yalançılıqda ittiham etdi