Paşinyandan ziqzaqlı hərəkət: "Baş nazirin İTV-yə cavabı ziddiyyətlidir"

Albaniyada səfərdə olan Ermənistanın Baş naziri Nikol Paşinyan Azərbaycanın İctimai Televiziyasına (İTV) müsahibə verib. İTV-nin müxbiri Ermənistanın yeni Konstitusiyasında Müstəqillik haqqında Bəyannaməyə istinadın olub-olmayacağı barədə sual ünvanlayıb. Paşinyan cavabında bildirib ki, Ermənistanda hələ yeni konstitusiya layihəsi yoxdur.

Sfera.az xəbər verir ki, məsələ ilə bağlı siyasi şərhçi Asif Nərimanlı bildirib ki, İTV-nin sualı rəsmi Bakının sülh sazişinin imzalanması üçün irəli sürdüyü son şərtləri əks etdirir.

Onun sözlərinə görə, bu sual regionda davamlı sülhün perspektivləri baxımından Azərbaycan ictimaiyyətinin cavab tapmaq istədiyi əsas məqamları gündəmə gətirib:

"Azərbaycan ATƏT-in Minsk qrupunun de-yure buraxılmasını və Ermənistan Konstitusiyasında Azərbaycana qarşı ərazi iddialarının aradan qaldırılmasını istəyir".

A.Nərimanlı qeyd edib ki, Paşinyan suallara verdiyi cavabda ziddiyyətli mövqe sərgiləyib:

"O, bir tərəfdən Ermənistan Konstitusiyasının dəyişməsinə ehtiyac olmadığını deyir, digər tərəfdən isə sülh sazişinin ratifikasiyası ilə ərazi iddialarına istinad edilməyəcəyini bəyan edir. Paşinyan iddia edir ki, Ermənistan Konstitusiya Məhkəməsi artıq "ölkənin qonşulara qarşı ərazi iddiası olmadığı" qərarını verib. Lakin bu, gələcəkdə mümkün hakimiyyət dəyişikliyi fonunda erməni revanşistlərin Konstitusiyanın və Müstəqillik Bəyannaməsinin şərhinə əsaslanaraq iddiaları yenidən gündəmə gətirə biləcəyi ehtimalını aradan qaldırmır”.

Ekspertin fikrincə, Paşinyanın Minsk qrupunun buraxılması ilə bağlı yanaşması da qeyri-müəyyəndir. Ermənistan rəhbəri Azərbaycanın bu məsələ ilə bağlı mövqeyinə razı olduğunu desə də, bunun arxasında “Azərbaycan münaqişəni öz ərazisində bağlayıb Ermənistan ərazisinə keçirməyə çalışmasın” şərtini irəli sürür.
“Burada Paşinyan Qərbi Azərbaycan məsələsini nəzərdə tutur. Halbuki, azərbaycanlı qaçqınların öz doğma yurdlarına qayıdışı beynəlxalq hüququn tələbidir, Ermənistan əleyhinə ərazi iddiası deyil. Rəsmi İrəvan isə bu prosesi siyasiləşdirməyə və "ərazi iddiası" kimi təqdim etməyə çalışır”, – deyə A.Nərimanlı qeyd edib.
O vurğulayıb ki, azərbaycanlı jurnalistin sualı Paşinyanı ilk dəfə olaraq Azərbaycan ictimaiyyəti qarşısında açıq cavab verməyə məcbur edib və bu, Bakı üçün diplomatik cəhətdən mühüm addımdır:

“Nikol Paşinyan bu dəfə eyni iddiaları Azərbaycan ictimai rəyinə "satmağa" çalışdı. Lakin sualın mahiyyəti onu Bakının konkret tələblərinə cavab verməyə məcbur etdi. Bu, ilk baxışdan simvolik görünə bilər, lakin real diplomatik təsir gücünə malik jestdir”.

Bəsti Rəfizadə
Sfera.az