Tramp Putini çıxdaş edir? - ABŞ-nin yeni MƏQSƏDİ
ABŞ Prezidenti Donald Tramp Rusiyaya qarşı yeni sanksiyalar layihəsini dəstəklədiyini və bu istiqamətdə konkret addımlar atmağa hazır olduğunu bildirib. Ukrayna Prezidenti Volodimir Zelenski ilə son görüşündə Tramp Rusiyaya qarşı sanksiyaların gücləndirilməsinə dair fikirlərini bölüşüb və bu tədbirlərin tezliklə həyata keçiriləcəyini vurğulayıb.
Maraqlıdır, bu nəyin əlamətidir? Tramp ABŞ-nin Rusiyaya qarşı əvvəlki siyasətini bərpa edir yoxsa bu, parlamentə aralıq seçkilər öncəsində seçicilərin dəstəyini qazanmaq cəhdidir?
Mövcud suallarla bağlı Sfera.az-a açıqlama verən millət vəkili Hikmət Babaoğlu Trampın son 100 gündə verdiyi qərarları təhlil etdikdə, burada müəyyən məntiqi ardıcıllığın gerçəkləşdiyi müşahidə olunduğunu bildirib.
Onun sözlərinə görə, atılan addımlar ilkin baxışda təsadüfi və emosional təsir bağışlasa da, diqqətlə nəzər saldıqda bu siyasətin arxasında sistemli və planlı yanaşmanın dayandığı görünür:
“Hazırkı mərhələdə Ukrayna ilə razılaşma imzalanan kimi, ABŞ Dövlət Departamentinin nümayəndələri bildirdilər ki, ABŞ Ukrayna–Rusiya qarşıdurmasında vasitəçilik rolundan imtina edə bilər. Bu ifadə sıradan bir fikir deyil, əksinə, Moskvaya yönəlmiş konkret bir siqnaldır. Ardınca tətbiq edilən yeni və daha sərt sanksiyalar da həmin mesajın davamı kimi dəyərləndirilməlidir”.
Deputatın fikrincə, vasitəçilikdən geri çəkilmək o anlamı daşıyır ki, Vaşinqton artıq bu məsələdə tərəf seçmək məcburiyyətindədir: “Bu seçim isə aydındır. ABŞ artıq Ukraynanın yanında mövqe tutur. Çünki o, Kiyev ilə ciddi və gələcəyə hesablanmış bir razılaşma imzalaya bilib”.
H.Babaoğlu bu istiqamətdə yaxınlaşan aralıq seçkilərin müəyyən təsirə malik olduğunu, lakin bu faktorun çəkisinin olduqca zəif olduğunu vurğulayıb.
O qeyd edib ki, əsas məsələ ondan ibarətdir ki, Birləşmiş Ştatlar son 100 gündə öz maraqları çərçivəsində formalaşdırdığı geosiyasi reallıqlar fonunda yeni strateji mövqeyini ortaya qoyub.
Fidan Hacızadə
Sfera.az
