Hindistanla Pakistan arasında gərginlik artır - Azərbaycan hansı mövqeyi tutmalıdır?

Son günlər Hindistanla Pakistan arasında artan gərginlik beynəlxalq ictimaiyyətin diqqət mərkəzinə çevrilib. İki ölkə arasında yaranan gərginlik fonunda, Azərbaycanın bu vəziyyətdə necə mövqe sərgiləməli olduğu müzakirə mövzusuna çevrilib. 

Məsələ ilə bağlı "Cross Media" Təhlil Mərkəzinin analitiki, siyasi şərhçi Mübariz Göyüşlü Sfera.az-a açıqlamasında bildirdi ki, Pakistan Azərbaycanın çox yaxın tərəfdaşıdır və belə həssas məqamda ölkəmiz münasibətlərə uyğun davranmalıdır:

"Azərbaycan siyasi, diplomatik, mənəvi və digər istiqamətlərdə Pakistanın yanında olmalıdır. Bu, çox mühüm bir məsələdir. Azərbaycan bu məqamda Pakistanla bağlı həmrəyliyini ifadə edə bilər və buna ciddi ehtiyac var”.

M.Göyüşlü vurğulayıb ki, Pakistan müsəlman ölkəsi olmaqla yanaşı, Qarabağ məsələsində də daim Azərbaycanın mövqeyini birmənalı şəkildə dəstəkləyib:

“Biz də Pakistanı dəstəkləməliyik. Düşünürəm ki, bu məsələdə Pakistan haqlı tərəfdir. Hindistan müxtəlif qurumlar və dövlət strukturları vasitəsilə gərgin vəziyyəti süni şəkildə formalaşdırmağa çalışır. Mən bu davranışı qınayıram. Müharibə həddinə gətirilmiş bu prosesin Hindistan tərəfindən bilərəkdən təşkil olunduğu hiss olunur".

Azərbaycanın Pakistanı dəstəkləməsinin Hindistanla münasibətlərə mənfi təsir edib-etməyəcəyi məsələsinə toxunan analitik bildirib:

“Güman etmirəm ki, Azərbaycanın Pakistana verdiyi dəstək Hindistanla münasibətləri pisləşdirəcək. Əgər Hindistan bundan narahat olub münasibətləri gərginləşdirmək qərarına gəlsə, bu, onların yanlış addımı olacaq. Onsuz da Hindistan açıq şəkildə Ermənistana hərbi dəstək verir. Biz Pakistanı dəstəkləməsək belə, Hindistanın bizə qarşı münasibətinin müsbət olacağı inandırıcı deyil. Ona görə də belə bir həssas məqamda Pakistanla həmrəylik nümayiş etdirmək Azərbaycanın mövqeyinin təbii ifadəsi olmalıdır”.

Bəsti Rəfizadə