"Onları hakimiyyət və xaricdən gələn tapşırıqların icrası düşündürür"

"Demokratiya şüarları ilə hakimiyyəti dəyişmək olar, amma demokratiya qurmaq olmaz"

"Tramp müharibəni Rusiyanın istədiyi formada sonuclandırmalıdır, çünki..."

Deputat, Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini, Ədalət, Hüquq, Demokratiya (ƏHD) Partiyasının sədri Qüdrət Həsənquliyev Moderator.az -ın suallarını cavablandırıb.

- Qüdrət bəy, iqtidar tərəfindən siyasi partiyaların işğaldan azad olunmuş rayonlara səfərləri təşkil olunur, partiya liderləri ilə müxtəlif mövzuda görüşlər keçirilir, amma bəziləri bunu birmənalı qəbul etmir. Sizin fikirlərinizi bilmək maraqlı olardı.

Marginallaşmış, hər şeyə etiraz etməyə vərdiş etmiş, bu cür davranışı həyat tərzinə çevirmiş bir qrup insan və kənardan təlimatladırılanlar bundan narazıdırlar. Onları hakimiyyət və xaricdən gələn tapşırıqların icrası düşündürür. Fikirləşirlər ki, cəmiyyətin parçalanması və qarşıdurma onların işinə yaraya bilər. Amma cəmiyyətdən onlara dəstək yoxdur. Cəmiyyətin passionar və savadlı hissəsi başa düşür ki, demokratiyanın inkişafı cəmiyyətin inkişaf səviyyəsinə bağlıdır. İnsanları mövcud problemlərə görə etiraz aksiyalarına çıxmadıqları üçün qorxaqlıqda ittiham edənlər düşüncəsiz və ya cəmiyyət üçün ən təhlükəli insanlardır. Əfqanları, yaxud ərəbləri heç kim qorxaqlıqda ittiham edə bilməz, amma İraqı, Əfqanıstanı ABŞ işğal edib, 10 illərlə işğal altında saxlasa da, trilyonlarla vəsait xərcləsə də həmin ölkələrdə demokratiya qura bilmədi. Bu gün Əfqanıstanda televiziyalar radio kimi fəaliyyət göstərir, çünki insanların sifətinin göstərilməsi qadağan olunub. Xalqın da çoxluğu bunu normal qəbul edir. Demokratiya şüarları ilə hakimiyyəti dəyişmək olar, amma demokratiya qurmaq olmaz.

Bu gün Prezidentin köməkçisi Ədalət Vəliyevin və onun rəhbərlik etdiyi şöbənin əməkdaşlarının fəaliyyəti nəticəsində siyasi partiyalar arasında, iqtidarla siyasi pariyalar arasında əməkdaşlıq mühiti yaranıb. Bu cür tədbirlərdə siyasi partiya sədrləri bir-biri ilə görüşür, söhbətləşir, iqtidar nümayəndələrinin diqqətinə müəyyən məsələləri çatdırır, ümummilli məsələlərdə vahid mövqedən çıxış edirlər. Qarabağa səfər hər bir azərbaycanlının arzusudur, partiya sədrlərinin səfəri də onların xahişi ilə baş tutur. Məsələn, üzürlü səbəbdən özüm qatıla bilməsəm də (pariya rəhbərliyindən iki nəfər qatılmışdı) Xankəndinə səfərin təşkil olunmasını xahiş edənlərdən biri də mən idim. Burda pis olan nədir?

Yeri gəlmişkən işğaldan azad olunmuş ərazilərə "viza" ilə gediş-gəlişə son qoyulmalıdır. Havalar qızır, hər kəsə imkan yaradılmalıdır ki, gedib Şuşada, Xankəndində , Kəlbəcərdə, Laçında və s. dincəlsin, oralarda gəzsin.

Eyni zamnada iqtidarı torpaqlarımızın işğalına son qoyulması üçün həyatlarını qurban vermiş şəhidlərimizin ailələrinə azad olunmuş yaşıllıq ərazilərdə fərdi yay evlərinin tikinrtisi üçün 8-10 sot torpaq sahəsi ayırmağa çağırıram.

- Qüdrət bəy, Əvəz Zeynallının azad olunmasını necə qarşıladınız?

Cinayət Məcəlləsinin 78-ci maddəsinə görə ağır xəstəliyə düçar olmuş şəxs məhkəmənin qərarı ilə cəza çəkməkdən azad oluna bilər. Əvəz Zeynallının səhhətində yaranmış ciddi problemlərə görə belə qərarın qəbul olunması ədalətli və humanist qərardır. Əvvəllər də söyləmişəm, şəxsiyyət və dövlət əleyhinə xüsusilə ağır cinayətlər törətmiş şəxslər istisna olmaqla insan hüquqlarını müdafiə təşkilatları tərəfindən həbs olunmasında siyasi motivlərin olduğu iddia olunan digər şəxslərin, xüsusilə qızların azadlığa buraxılmasını ölkəmizin maraqlarına və milli mənəvi dəyərlərimizə uyğun hesab edirəm, həmin qurumların haqlı olub-olmamasından asılı olmayaraq. Çünki onların çoxu uzun müddətdir məhbəs həyatı yaşayır və inanıram ki, azadlığa çıxandan sonra əksəriyyəti fəaliyyətlərində düzəlişlər edəcəklər. Bu, həm də milli birlik və ölkəmizə qarşı xarici təzyiqlərə bəhanə verməmək üçün lazımdır.

- Ukraynada tezliklə atəşkəs barədə razılıq əldə olunacağına dair ümidlər özünü doğruldacaqmı? Ukrayna güzəştə getməsə, atəşkəs alınmasa, Tramp danışıqlardan çıxa bilərmi?

Hamı arzu edir ki, müharibə dayansın. Amma müharibənin nəticələri dünyada yeni müharibələrə yol açmamalıdır. Müharibə münasibətlərin aydınlaşdırılması vasitəsi olmamalıdır. Atəşkəs Putindən asılıdır. O icazə verməsə Tramp danışıqlardan çıxa bilməz. Tramp müharibəni Rusiyanın istədiyi formada sonuclandırmalıdır, çünki Putin onun sağ qalması, ola bilsin həm də seçilməsi üçün dua edib. ABŞ-nin başqa dövlətlərlə, o cümlədən Azərbaycanla əlaqələri və qəbul etdiyi qərarlar da müəyyən mənada Rusiyadan gələn göstərişlər əsasında olacaq. Mən zamanında iqtidarı bunu nəzərə almağa, eyni zamanda ABŞ-dan kənar durmağa, dost olmağa can atmamağa çağırmışdım. Bu ölkə ilə əməkdaşlıq etmək olar, amma güvənmək olmaz.

Ukraynanın taleyi isə ABŞ xalqından asılıdır. Xalq Trampa təzyiq etsə və Putin görsə ki, Trampı çox sıxsa onu devirə bilərlər, onda mövqeyini yumşalda bilər. Çünki Tramp Ukraynadan da vacib işlər üçün Putinə lazımdı.

"İşğaldan azad olunmuş ərazilərə "viza" ilə gediş-gəlişə son qoyulmalıdır"