Bakıda Rusiya–Suriya görüşü olub - Moskva təsdiqlədi

Rusiya Xarici Kəşfiyyat Xidmətinin (XKX) direktoru Sergey Narışkin ötən həftə Bakıda keçirilən beynəlxalq tədbir çərçivəsində Suriyalı yüksək vəzifəli rəsmi ilə görüş keçirdiyini təsdiqləyib. Bu, Suriyada Bəşər Əsəd rejiminin devrilməsindən sonra Moskva ilə Dəməşq arasında baş tutan ilk rəsmi diplomatik təmaslardan biri kimi qiymətləndirilir.

Sfera.az "NTV"yə istinadən xəbər verir ki, Narışkin Rusiya dövlət xəbər agentliyi "TASS"a verdiyi açıqlamada, 17–18 aprel tarixlərində Bakıda təşkil olunan “Əfqanıstan: Regional Əlaqəlilik, Təhlükəsizlik və İnkişaf” adlı beynəlxalq konfransda iştirak etdiyini bildirib.

Onun sözlərinə görə, tədbirdə Orta Şərq və Böyük Avrasiya regionundan yüksək səviyyəli rəsmilər iştirak edib.

“Ötən həftə Bakıda Əfqanıstan mövzusunda yüksək səviyyəli bir konfrans keçirildi. Tədbirdə Suriyadan da yüksək rütbəli bir nümayəndə var idi. Onunla olduqca konstruktiv və dostyana bir görüş keçirdik”, - deyə Narışkin bildirib.

Xatırladaq ki, hazırda Suriyada yerləşən Rusiya hərbi bazalarının taleyi və iki ölkə arasındakı yeni əməkdaşlıq formatı diqqət mərkəzindədir. Bakıda keçirilən bu görüş isə Moskva ilə yeni Dəməşq rəhbərliyi arasında münasibətlərin formalaşmasına doğru atılan ilk addım kimi dəyərləndirilir.

Bəsti Rəfizadə