Ukrayna hökuməti ABŞ-nin dəstəyinin tamamilə dayandırılması ehtimalına qarşı ən pis ssenariyə hazırlaşır.

Sfera.az xəbər verir ki, bu barədə Ukrayna hökumətindəki mənbə bildirib. Mənbə, Prezident Donald Trampın təklif etdiyi sülh planının Kiyev üçün qəbuledilməz olduğunu vurğulayaraq, ABŞ-nin Rusiyaya qarşı təzyiq göstərməməsindən və sanksiyalar tətbiq etməməsindən narazılığını ifadə edib.

ABŞ-nin dəstəyi olmadan müharibə nə qədər davam edə bilər? Alternativ dəstək (Qərb) nə dərəcədə güclü olacaq?

Mövcud suallarla bağlı Sfera.az-a açıqlama verən politoloq Elçin Xalidbəyli Ukrayna ordusu hazırda savaş meydanında əsasən Avropa Birliyinin dəstəyi hesabına müqavimət göstərdiyini deyib.

Müsahibimizin fikrincə, bu mənzərədə yaxın zamanda ciddi bir dəyişikliyin baş verəcəyi gözlənilmir:

“Donald Trampın hakimiyyətə gəlməsindən sonra ABŞ-nin Ukraynaya dəstəyi demək olar ki, tamamilə dayandırılıb. Yeganə gözlənilən, bu dəstəyin rəsmi şəkildə dayandırıldığının bəyan olunmasıdır”.

Politoloq ABŞ-nin Ukraynaya yardım etmədiyini rəsmi olaraq açıqlayacağı təqdirdə bunun Kiyev üçün ciddi problemlər yarada biləcəyini vurğulayıb. E.Xalidbəyli diqqətə çatdırıb ki, belə bir addım Aİ-nin də dəstəyini zəiflədə bilər:

“Çünki Avropa Birliyi daxilində Ukraynaya yardım məsələsində kifayət qədər fikir ayrılıqları mövcuddur. Xüsusilə Macarıstan kimi ölkələr Ukraynaya yardım göstərilməsinə qarşı çıxır və hətta bu köməyin tamamilə dayandırılmasını tələb edirlər. Bu baxımdan, ABŞ-nin dəstəyinin rəsmən dayandırılması, Avropa Birliyində də Ukrayna ilə bağlı qərarların intensivləşməsinə, ziddiyyətlərin isə daha da dərinləşməsinə səbəb ola bilər. Bəzi Aİ ölkələri ABŞ-ni nümunə göstərərək, dəstəyin kəsilməsini daha sərt şəkildə tələb edə bilərlər.

Əgər Avropa Birliyi də Ukraynaya yardımı dayandırarsa, Kiyevin uzun müddət müharibə aparmaq imkanları xeyli azalacaq və bu halda Ukraynanın məğlubiyyəti qaçılmaz görünə bilər”.

Fidan Hacızadə

Ukraynanın ABŞ etirafı nəyi dəyişəcək? - AÇIQLAMA