Türkiyə Prezidenti Rəcəb Tayyib Ərdoğana PKK-nın aprelin sonuna qədər özünü buraxacağı barədə məlumat verilib.

Maraqlıdır, PKK-nın özünü buraxması hansı şərtlər altında baş tuta bilər? Beynəlxalq aktorlar (ABŞ, Avropa Birliyi və s.) bu xəbərə necə münasibət göstərəcək?

Suallarla bağlı Sfera.az-a açıqlama verən politoloq Natiq Miri heç bir şərt olmadan və konkret hansısa müzakirə və iddialar irəli sürülmədən silahların Türkiyənin təhlükəsizlik orqanlarına, güc strukturlarına təhvil veriləcəyini və bu təşkilatın öz fəaliyyətinə son qoyacağını vurğulayıb.

Onun sözlərinə görə, bu təşkilatın içərisində ağır cinayətlər törətmiş və türk əsgərinin, mülki şəxslərin qanına batan insanlar var. Ekspert bu təşkilata qoşulmuş, lakin türk xalqına zərər verməmiş şəxslərin isə əfv edilə biləcəyini diqqətə çatdırıb.

"Uzun illərdir PKK-nı təmin edən müəyyən logistik mərkəz olaraq onlara şərait yaradan Avropada Qərb dünyası var ki, xüsusilə Fransa və Almaniya kimi dövlətlər, hətta Skandinaviya ölkələri artıq bununla bağlı hər hansı hüquqi, siyasi bəyanat vermək və buna etiraz etmək imkanına sahib deyillər. Çünki nə qədər terror təşkilatı kimi tanınsalar da, Qərb dünyası bu qüvvələri daim “azadlıq uğrunda mübarizə aparan güc mərkəzi” kimi təqdim edirdi. Ən azından informasiya səviyyəsində. Və belə bir vəziyyətdə bu təşkilatı quran, hələ də bu təşkilatın rəhbəri kimi çıxış edən terrorçu başı Öcalan artıq Türkiyədəki bütün kanallardan açıq şəkildə bəyan etdi ki, “bu təşkilatı mən qurmuşam və artıq bu təşkilatdan da imtina edirəm. Çünki o dövrlə bu gün eyni deyil. Artıq Fransa inqilabına bənzər bir azadlıq mübarizəsindən söhbət gedə bilməz”,- ekspert bildirib.

N.Miri əlavə edib ki, indi birlik zamanıdır və bu birlik həm türk, həm də kürd xalqı üçün xeyirli olacaq bir vəziyyət yaradacaq:

“Ona görə də bu, elə bir silah, Türkiyə Dövlətinin elə bir addımı idi ki, artıq xarici güclərə hər hansı bir imkan, etiraz haqqı verilmədi. Çünki bu təşkilatı yaradan şəxs təşkilatın buraxıldığını açıq şəkildə bəyan edirsə, buna kim etiraz edə bilər? Ona görə də burada seçim o qədər də geniş deyil. PKK-dan bəslənən, xalqın qanı ilə milyonlar qazanan Karayılan və Dursun kimi cinayətkar rəhbərlər var. Ancaq onların da bu prosesə açıq şəkildə qarşı çıxmaq imkanları böyük deyil. Çünki Öcalan tərəfdarları, PKK tərəfdarlarından daha çoxdur”.

Analitik, bu baxımdan, onların həm təhlükəsizlikləri, həm də özlərinin mümkün cəzalandırılmasından qorxaraq bu məsələyə açıq şəkildə qarşı çıxa bilməyəcəklərini qeyd edib. N.Mirinin fikrincə, ona görə də burada seçim çox deyil:

“Silahı yerə qoyub təslim olacaqlar. Ümumilikdə isə Türkiyə Dövləti artıq Öcalanın bəyanatı ilə əlinə elə bir hüquqi zəmin, elə bir əsas alıb ki, bütün terrorçu ünsürləri məhv edə bilər. Buna görə də, demək olar ki, Ankara artıq terrordan azad bir Türkiyə anlayışına bir addım yaxınlaşıb. Bu isə Türkiyəyə qarşı edilən təzyiq imkanlarını, xüsusilə xaricdən gələn təzyiq imkanlarını tükəndirir. Türkiyənin daha da güclənməsinə, xüsusilə daxildə milli birliyə nail olunmasının qarşısını açır. Yəni gördüyümüz kimi, günü-gündən güclənən bir Türkiyə müşahidə olunur. Və bu proses bu şəkildə davam edəcək”.

Fidan Hacızadə

Ərdoğana məlumat gəldi - PKK tamamilə ləğv olunacaq?