HƏMAS Türkiyənin dəstəyi ilə Qəzza zolağında atəşkəs əldə etmək üçün yeni təşəbbüslər irəli sürür. Türkiyə Prezidenti Rəcəb Tayyib Ərdoğan HƏMAS-ın atəşkəs təklifini qəbul etməsini alqışlayaraq, İsraildən də eyni addımı atmasını gözlədiklərini bildirib.

Marağlıdır ki, İsrailin bu şərtlərə münasibəti necə ola bilər? Türkiyə HƏMAS - İsrail məsələsində hansı real təsir gücünə sahibdir?

Mövcud suallarla bağlı Sfera.az-a açıqlama verən siyasi şərhçi Kənan Novruzov Yaxın Şərqdə baş verən müharibənin yaxın vaxtlarda bitmə ehtimalının olmadığını bildirib.

Politoloq Türkiyənin bu proseslərdə Rusiya-Ukrayna müharibəsində olduğu kimi konstruktiv rol alacağını da inanmır:

“Çünki bu, Türkiyənin imkanlarından daha böyük məsələdir. Sadəcə olaraq, HƏMAS mümkün qədər Türkiyənin dəstəyini almağa çalışır. Təbii ki, Türkiyə bu məsələdə soyuqqanlı davranacaq. Ankara İsrail ilə birbaşa hərbi toqquşmadan mümkün qədər qaçmağa çalışacaq, İsrailin özü də bunu istəmir. Çünki belə bir qarşıdurmanın fəsadları çox böyük ola bilər”.

Müsahibimiz bildirib ki, əgər Türkiyə bu qarşıdurmaya daxil olarsa, bu, onun ABŞ ilə münasibətlərinə ciddi şəkildə təsir edəcək:

“Amma Türkiyənin maraqları nəzərə alınmasa rəsmi Ankara sonsuza qədər səbir göstərə bilməz. Buna baxmayaraq, hansısa konstruktiv irəliləyişin mümkün olduğunu düşünmürəm. İsrail tərəfi, xüsusilə Baş nazir Benyamin Netanyahunun başçılığı ilə siyasi elita olduqca radikal mövqe nümayiş etdirir. Onlar açıq şəkildə bəyan edirlər ki, HƏMAS məhv edilməlidir”.

K.Novruzovun qənaətincə, bu cür bəyanatları verən bir lider geri çəkilərsə, xalq onu hakimiyyətdə saxlamayacaq:

“Çünki siyasi lider verdiyi bəyanatların arxasında durmalıdır. Ancaq bu radikal mövqe İsrail hökumətində müəyyən təzadlara da səbəb olur. Müharibənin isə davam edəcəyi və daha çətin bir fazaya keçəcəyi ehtimalı yüksəkdir”.

Fidan Hacızadə

Türkiyə HƏMAS-İsrail məsələsində hansı addımları atacaq? - AÇIQLAMA