Kreml: "Ukraynanın NATO-ya üzvlüyü ilə bağlı ABŞ-nin mövqeyi bizi məmnun edir"
Kreml ABŞ-nin Ukraynanın NATO üzvlüyü məsələsində mövqeyini dəyişdirməsini müsbət qarşılayıb.
Sfera.az “Reuters”nəşrinə istinadən xəbər verir ki, Kremlin sözçüsü Dmitri Peskov, ABŞ-nin Ukraynanın NATO-ya üzvlük təklifinin masadan çıxarıldığını açıqlayaraq, bunun Moskvanın mövqeyi ilə uyğun olduğunu bildirib. Peskov, Ukraynanın NATO üzvlüyünün Rusiyanın milli maraqları üçün ciddi təhdid yaratdığını vurğulayıb.
ABŞ səfiri General Keith Kellogg bazar günü verdiyi açıqlamada, Ukraynanın NATO üzvlüyünün artıq “masadan çıxarıldığını” açıqlamışdı. ABŞ Prezidenti Donald Trump, əvvəllər Ukraynanın NATO-ya üzv olmasının müharibəyə səbəb olduğunu bəyan etmişdi.
Kremlin nümayəndəsi, Ukraynanın NATO üzvü olmasının münaqişənin əsas səbəblərindən biri olduğunu bildirərək, Rusiyanın bu məsələyə olan münasibətini təkrarladı. Putin isə dəfələrlə Ukraynanın NATO üzvü olma arzusunu tərk etməsi və Rusiya tərəfindən nəzarət edilən ərazilərdən qoşunlarını çəkməsi şərti ilə müharibəni bitirməyə hazır olduqlarını bildirmişdi.
Tramp, Ukraynadakı münaqişənin bu həftə sona çatması üçün razılaşma əldə edilməsini ümid etdiyini bəyan edib. Kremlin sözçüsü isə bu məsələ ilə bağlı zaman çərçivəsi verməkdən çəkinib və Rusiya tərəfinin sülh həllinə hazır olduğunu təkrar edib.
Bu arada, ABŞ-nin Rusiyanın Krım üzərindəki nəzarətini tanımağa hazır olub-olmadığı barədə yayılan xəbərlərə Kremlin təmsilçisi şərh verməyib və sülh həllinin gizli şəkildə aparılması gərəkdiyini qeyd edib.
Fidan Hacızadə
