Azərbaycan və Çin arasındakı münasibətlər qarşılıqlı etimada əsaslanır. Heç kəsə sirr deyil ki, bu gün Azərbaycan bir sıra dünya ölkələri ilə, xüsusən də Çin Xalq Respublikası ilə strateji tərəfdaşlıq münasibətlərinə malikdir.

Sfera.az xəbər verir ki, bu fikirləri Trend-ə açıqlamasında Milli Məclisin deputatı, Azərbaycan-Çin parlamentlərarası əlaqələr üzrə işçi qrupunun rəhbəri Soltan Məmmədov deyib.

Deputat bildirib ki, ötən il Şanxay Əməkdaşlıq Təşkilatının Astanada keçirilən Zirvə Toplantısında imzalanan “Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə” ölkələrimiz arasındakı münasibətlərin tarixində yeni səhifə açdı.

“Prezident İlham Əliyev də Çin kimi nəhəng ölkə ilə strateji tərəfdaşlıq formatına nail olmağın bizim üçün olduqca vacib olduğunu öz çıxışlarında vurğulayıb. Bəyannamədə ərazi bütövlüyünə və suverenliyə qarşılıqlı hörmət, daxili işlərə qarışmamaq, regional və qlobal təhlükəsizliyin ən vacib məsələləri ilə bağlı fəaliyyətin koordinasiyası ilə bağlı mühüm müddəalar əksini tapıb.

Bu sənəd, eyni zamanda, “Bir kəmər, bir yol” çərçivəsində praktiki əməkdaşlığı dərinləşdirməyi nəzərdə tutur. Neft və qaz, neft-kimya, eləcə də yaşıl enerji, elektrik enerjisi, yüksək texnologiyalar və innovasiyalar, süni intellekt və kosmik sahədə sərmayə əməkdaşlığının inkişafı vurğulanır. Bütün bunlar Azərbaycanla Çin arasında əlaqələrin kifayət qədər geniş spektrdə inkişaf etdirilməsi niyyətini ifadə edir”.

Soltan Məmmədov vurğulayıb ki, Azərbaycan “Yaşıl enerji” sektorunun inkişafında çox maraqlıdır. Çin şirkətlərinin Azərbaycanın bərpaolununan enerji sektoruna investisiya yatırması bu sahənin inkişafında mühüm rol oynaya bilər.

“COP29 zamanı bir sıra Çin şirkətləri ilə “yaşıl enerji” sahəsində müvafiq sənədlər imzalandı. Çinin bu bərpaolunan enerji istehsalı sahəsində təcrübəsi Azərbaycanın qarşısına qoyduğu hədəflərin reallaşdırılması baxımından faydalı ola bilər. Ona görə də bizim ölkəmiz Çin şirkətlərinin bu istiqamətdə investisiya təşəbbüslərini fəal şəkildə dəstəkləyir”.

S.Məmmədov, eyni zamanda, Heydər Əliyev Fondunun Xarici Ölkələrlə Dostluq üzrə Çin Xalq Assosiyasiyası ilə sıx əməkdaşlıq etdiyini vurğulayıb.

Bildirib ki, iki qurum arasındakı əlaqələr dövlətlər və xalqlar arasında münasibətlərin inkişafına töhfə vermək məqsədi daşıyır. Bu əməkdaşlıq çərçivəsində bir çox uğurlu layihələr həyata keçirilib.

Deputat qeyd edib ki, Azərbaycanla Çinin imzaladığı Birgə Bəyannamənin əsas müddəalarından biri də qanunverici orqanlar arasında beynəlxalq və regional təşkilatlar çərçivəsində əməkdaşlığın inkişafını nəzərdə tutur:

“Bir neçə gün öncə Çin nümayəndə heyəti ilə görüşdə ikitərəfli münasibətlər zəminində görülən işlər müzakirə edildi, gələcək layihələr barədə fikir mübadiləsi aparıldı. Parlamentlərarası əlaqələrin inkişafı hər iki tərəfin xüsusi önəm verdiyi məsələlərdən biridir”.

Azərbaycan və Çin arasındakı münasibətlər qarşılıqlı etimada əsaslanır - Soltan Məmmədov