Son günlərdə Azərbaycan ictimaiyyəti, eləcə də beynəlxalq medianın diqqəti bir casusluq qalmaqalına yönəlib. Fransa vətəndaşı Martin Ryan casusluqda, Azərbaycan vətəndaşı Azad Məmmədli isə dövlətə xəyanətdə ittiham olunaraq cinayət məsuliyyətinə cəlb edilib. Dövlət Təhlükəsizliyi Xidməti tərəfindən aparılan istintaqa əsasən, Martin Ryan Fransa kəşfiyyatının agenti kimi Azərbaycanda fəaliyyət göstərib və doqquz Azərbaycan vətəndaşını casusluğa cəlb edib. Azad Məmmədli isə Ryan vasitəsilə məlumatların ötürülməsində iştirak etməkdə şübhəli bilinir. Bu hadisə ətrafında yaranan rezonans təkcə hüquqi yox, həm də siyasi müstəvidə müzakirə olunur.

Mövzu ilə bağlı Sfera.az-a açıqlama verən politoloq Tural İsmayılovun fikrincə, bu qalmaqal sadəcə fərdi casusluq hadisəsi deyil, daha böyük və sistemli bir planın tərkib hissəsidir:

“Fransa bütövlükdə Azərbaycana qarşı ciddi şəkildə qəbuledilməz siyasət həyata keçirir. Son zamanlarda xüsusilə Fransanın Azərbaycan əleyhinə müxtəlif bəyanatlar səsləndirməsi, ölkənin daxili işlərinə qarışmağa çalışması, həmçinin bundan əvvəl Azərbaycanın təhlükəsizlik orqanları tərəfindən Fransanın casusluğa cəlb etdiyi Martin Ryan və azərbaycanlı Azad Məmmədlinin ifşa edilməsi də bir daha göstərir ki, Fransanın Azərbaycanla bağlı məkrli planları var”.

Politoloq qeyd edir ki, Azərbaycan artıq əvvəlki kimi zəif deyil və bu cür təzyiqlərə qarşı tab gətirəcək gücdədir:

“Azərbaycan dövləti bu gün çox güclüdür və xaricdən dövlətimizə qarşı yönələn istənilən təhdidlər qarşısında duruş gətirmək qabiliyyətinə malikdir. Fransa və onun havadarlarının regionda boğucu fəaliyyətinin qarşısı ölkəmiz tərəfindən qətiyyətlə alınır”.

T.İsmayılov əlavə edib ki, Fransanın Azərbaycana qarşı bu qədər fəallaşmasının əsas səbəblərindən biri regionda gedən geosiyasi dəyişikliklərdir:

“Azərbaycanın artan nüfuzu, regionda söz sahibi olması, müstəqil siyasət yürütməsi bəzi Qərb dövlətlərini, xüsusilə Fransanı ciddi narahat edir. Fransa öz postkolonial təsir imkanlarını qorumaq istəyir və bu kontekstdə Cənubi Qafqazda gedən dəyişiklikləri öz maraqlarına təhdid kimi qiymətləndirir”.

O, eyni zamanda Fransanın erməni lobbisinin təsiri ilə hərəkət etdiyini də vurğuladı:

“Fransadakı erməni diasporunun və lobbi qruplarının dövlət siyasətinə birbaşa təsiri göz qabağındadır. Bu təsir özünü həm rəsmi bəyanatlarda, həm də Azərbaycana qarşı aparılan siyasi kampaniyalarda açıq şəkildə göstərir. Fransa birtərəfli yanaşması ilə regionda sülhə yox, qarşıdurmaya xidmət edir”.

Ekspertin fikrincə, Martin Ryanın ifşası təkcə bir fərdin məsuliyyəti deyil, Fransa dövlətinin regiondakı gizli niyyətlərini açığa çıxaran bir siqnaldır:

“Martin Ryanın casus kimi ifşa olunması Fransanın çirkin planlarının bir parçasıdır. Bu, bir dövlətin strateji maraqlar naminə Azərbaycan daxilində gizli fəaliyyət göstərdiyini sübut edən faktdır. Bu fakt həm də göstərdi ki, Azərbaycan xüsusi xidmət orqanları yüksək peşəkarlığa malikdir və milli təhlükəsizliyimizi qorumaqda tam qərarlıdır”.

Politoloqun sözlərinə görə, Fransa regionda sülhü təşviq etmək əvəzinə, Ermənistanı yeni təxribatlara həvəsləndirir:

“Son dövrlər Fransanın Azərbaycan və Ermənistan arasında sülh imkanlarının genişləndiyi bir dövrdə ölkəmizə qarşı qəsdən aqressiv addımlar atması bir daha sübut edir ki, Fransanın regionla bağlı real sülh düşüncəsi yoxdur. Əksinə, Ermənistanı sülhə təşviq etmək əvəzinə, Azərbaycana qarşı yeni müharibəyə və təxribatlara cəlb etməyə çalışır”.

Fransa ilə Azərbaycan arasındakı münasibətlər onsuz da gərgin idi. Martin Ryanın casusluq qalmaqalı isə bu münasibətlərdəki gərginliyi pik nöqtəyə çatdırdı. Politoloq T.İsmayılovun fikrincə, yaranmış vəziyyətin əsas məsuliyyəti Fransanın birtərəfli və təxribatçı siyasətinin üzərindədir. Həmçinin ekspert bildirib ki, Azərbaycanla Fransa arasındakı münasibətlərin belə olmasında Azərbaycan yox, Fransa itirir.

Bəsti Rəfizadə

Fransanı aqressivləşdirən nədir? - "Bundan Azərbaycan yox, Fransa itirir"