Azərbaycan xarici işlər naziri Ceyhun Bayramov Anadolu Agentliyinə müsahibəsində qeyd edib ki, sülh sazişinin imzalanması üçün Ermənistan Konstitusiyasında dəyişiklik edilməlidir. Ermənistan tərəfi isə bildirir ki, Konstitusiya dəyişikliyi 2026-cı ildə parlament seçkilərindən sonra mümkündür. Daha çox ehtimal edilən tarix 2027-ci ildir.

Belə anlaşılır ki, Azərbaycanla Ermənistan arasında sülh müqaviləsi tezliklə imzalanmayacaq. Bəs müqavilənin imzalanması üçün ən qısamüddətli proqnoz nə zamandır?

Mövzu ilə bağlı Sfera.az-a açıqlama verən politoloq Məhəmməd Əsədullazadə bildirib ki, Ermənistan tərəfi prosesi uzatmaqla konkret olaraq sülh gündəliyinin üstündən xətt çəkir.

Onun sözlərinə görə, əgər indiki 17 bəndlik sənədlə hər hansı bir müqavilə bağlansa, bu, yekun sülh müqaviləsidir və Ermənistan konstitusiyasına zidd olacaq:

“Ona görə də Azərbaycan konkret olaraq Ermənistana konstitusiyanın dəyişməsini tələb edir və Ermənistan bunu iki ay ərzində də həll edə bilər, amma həll etmir. Əksinə, daha çox silahlanır, müəyyən bir regional və beynəlxalq konyunkturanın lehinə dəyişməsini gözləyir. Konstitusiyanın dəyişməsinə iki il var. Bu iki il müddətində Ermənistan hərbi təxribatlara əl ata bilər. Onlar çalışır ki, Azərbaycana qarşı hərbi təxribat etməklə Azərbaycanı bir növ müharibə istəyən kimi təqdim etsin və sülh danışıqlarında öz mövqeyini möhkəmləndirsin. Ermənistanın əsas məqsədlərindən biri məhz budur”.

Politoloq qeyd edib, Ermənistan hərbi təxribatlar törədir, sülh pozursa, deməli, müharibə davam edir.

“Ermənistan hər gün şərti sərhəddə atəşkəsi pozur, silahlanır, şərti sərhəddə atəş mövqeləri qurur, artilleriya və raket batareyalarını yerləşdirir. Yəni göründüyü kimi Ermənistan hələ sülhə tələsmir, yalnız prosesləri manipulyasiya etməklə, beynəlxalq konyunkturanı aldatmaqla məşğuldur”,- M.Əsədullazadə vurğulayıb.

Firuzə Əliyeva

Ermənistan vaxtı uzatdı - Sülh sazişi nə zaman imzalanacaq?