İran və Ermənistan Nurdüz sərhəd qapısı ətrafında birgə hərbi təlim keçirib. İran İnqilab Keşikçiləri Ordusunun Quru Qoşunları Əməliyyat Köməkçisi, general-mayor Vəliullah Mani, təlimin sərhəd təhlükəsizliyini artırmaq məqsədini daşıdığını qeyd edib.

Bəs bu təlim Azərbaycan üçün hansısa təhdid doğururmu?

Sfera.az xəbər verir ki, mövzu ilə bağlı açıqlamasında politoloq Məhəmməd Əsədullazadə İranın Ermənistanla hərbi təlimlərinin Azərbaycana qarşı olduğunu bildirib.

Onun sözlərinə görə, Zəngəzura hücum edən "terrorçulara" qarşı şərti adla keçirilən təlimlər məhz Azərbaycana qarşı yönəlmiş addımdır. Tehran rejimi beş ildir ki, Zəngəzur dəhlizinin reallaşmasına qarşıdır və bu istiqamətdə addımlar atır.

M.Əsədullazadə qeyd edib ki, İran rəsmilərinin Azərbaycana mütəmadi səfərləri və bu ölkənin prezidentinin gözlənilən səfəri fonunda Ermənistanla hərbi təlimlərin keçirilməsi indidən səfərin Tehranda mühafizəkarlar tərəfindən sabotaj edilməsidir:

“İranın mühafizəkar dairəsi prezident M. Pezeşkianın Azərbaycanla normal siyasət qurulmasına qarşıdır. Bir tərəfdən İranın mötədil prezidentin administrasiyasının rəsmiləri İran ərazisindən keçəcək yolun inşası ilə bağlı Azərbaycan rəsmiləri ilə Zəngəzurun cənub hissəsində birgə baxış keçirir. Bir tərəfdən də mühafizəkar kəsimə tabe SEPAH Ermənistanla təlim keçirir. Bu onu göstərir ki, İranda Azərbaycana qarşı ikitirəli siyasət var. Belə olan təqdirdə prezident M. Pezeşkianın Azərbaycan səfəri ikitərəfli münasibətlərin inkişafına gətirib çıxarmayacaq”.

Politoloq vurğulayıb ki, bunlara baxmayaraq, iki ölkə arasında ortaq layihələrin həyata keçirilməsi istiqamətində mühüm irəliləyişlər əldə ediləcək. Çünki İrana qarşı artan sanksiyalar fonunda Azərbaycanla ortaq layihələrin inkişafına ehtiyac duyur.

Firuzə Əliyeva

İran və Ermənistan təlim keçirdi - Azərbaycana təhdid VAR?