Rusiya orduya çinli əsgərlər cəlb edir - Putinin gücü tükənib?

Rusiya və Ukrayna arasındakı müharibədə Rusiya tərəfindən döyüşən əcnəbi əsgərlər var. Şimali Koreyadan sonra Rusiya tərəfindən Çin əsgərlərinin döyüşməsinə dair faktlar aşkarlanıb. 

Rusiya tərəfindən əcnəbi əsgərlərin olması nəyin göstəricisidir? Rusiya yetəri qədər insan cəlb edə bilmir? Yoxsa başqa səbəblər var?

Mövcud suallarla bağlı Sfera.az-a açıqlama verən politoloq Əziz Əlibəyli bu məsələlərin insan resursları ilə bağlı olmadığını bildirib. Onun sözlərinə görə, ümumilikdə, Şimali Koreyanın əsgərlərinin həmin bölgədə iştirak etməsi çox inandırıcı görünmür:

"Lakin Rusiya tərəfindən dünyanın müxtəlif ölkələrindən gəlmiş muzdluların döyüşməsi faktoru mövcuddur. Bu, maddi ödəniş qarşılığında baş verən bir prosesdir. Şimali Koreya isə Rusiyanın hərbi müttəfiqidir və bilavasitə Rusiya ilə hərbi əməliyyatlarda maraqlı tərəf kimi iştirak edir. Çünki bu müharibənin başqa bir coğrafiyası olan Koreya yarımadasının siyasi gündəmdə olma ehtimalı mövcuddur. Hazırki vəziyyətdə əsas məsələ budur ki, Rusiyanın müharibəsində başqa bir dövlətin iştirakı, onun tək olmadığını göstərir. Bax, buna görə də belə addım lazımdır. Yoxsa Rusiyanın həm silahı, həm də insan resursu mövcuddur”.

Fidan Hacızadə