Son vaxtlar Ermənistan tərəfdən Azərbaycan ordusunun mövqeləri bir neçə dəfə atəşə tutulub. Dünən də eyni hal təkrarlanıb.

Ermənistan ordusunun sərhəddə silahlı insident törətməsi gərginliyi artırır. Sfera.az-a açıqlama verən politoloq Leyla Əzizli bu insidentlərin təsadüfi olmadığını vurğuladı. Onun fikrincə, Ermənistanın belə addımları sülh prosesini pozmağa hesablanıb:

“Bu kimi təxribatları əsasən danışıqlar masasında zəif mövqedə olan tərəf edir. Ermənistan daxilindəki siyasi qeyri-sabitlik və müəyyən radikal dairələrin sülhə qarşı çıxması bu cür atəşkəs pozuntularını şərtləndirə bilər”.

L.Əzizli qeyd edib ki, hazırkı mərhələdə Azərbaycan və Ermənistan arasında aparılan danışıqlar sülh müqaviləsinə doğru mühüm mərhələyə qədəm qoymuşdu:

"Lakin bu kimi hadisələr prosesin irəliləyişini ləngidə və qarşılıqlı etimadı zədələyə bilər. Regionda sabitlik və sülh bir sıra geosiyasi oyunçular üçün əlverişli olmaya bilər. Ona görə də bu cür təxribatlar, əslində, həm də üçüncü tərəflərin maraqlarına xidmət edir”.

Ekspert hesab edir ki, Azərbaycan bu hadisəni beynəlxalq səviyyədə gündəmə gətirməli, BMT və Avropa İttifaqı kimi qurumlar qarşısında məsuliyyət tələb etməlidir.

“Diplomatik səviyyədə bu insidentlərə səssiz qalmaq gələcəkdə daha ciddi pozuntulara yol aça bilər. Azərbaycanın bu məsələdə qəti və prinsipial mövqeyi olmalıdır. Azərbaycan ordusu bu kimi hallarda adekvat cavab tədbirləri görməkdə qərarlıdır. Lakin dövlətin əsas prioriteti bölgədə sabitliyin qorunması və sülh müqaviləsinin imzalanmasıdır", - deyə ekspert əlavə edib.

L.Əzizlinin fikrincə, istənilən hərbi eskalasiya regionda daha böyük qarşıdurmalara yol aça bilər:

“Hazırda diplomatik səbr və soyuqqanlılıq vacibdir. Lakin eyni zamanda ölkənin təhlükəsizliyi hər şeydən öndə gəlir və buna qarşı istənilən təhdid yerində cavabını almalıdır”.

Bəsti Rəfizadə

Ermənistan nə istəyir? : "Sərhəddəki insidentlər təsadüfi deyil"