Ermənistanla Azərbaycan arasında sülh müqaviləsinin bağlanması üçün danışıqlarda müsbət nəticələr var. Hətta hər iki tərəfin mövqeləri xeyli yaxınlaşıb.

Maraqlıdır, belə olan halda Ermənistan mina xəritələrini verməməkdə niyə təkid edir?

Mövzu ilə bağlı Sfera.az-a açıqlama verən deputat Elçin Mirzəbəyli bildirib ki, Ermənistanın mina xəritələrinin Azərbaycana verməməsinin əsas səbəbləri siyasi məqsədlər, dəqiq məlumatın olmaması və qarşılıqlı etimadsızlıqdır.

Millət vəkilinin sözlərinə görə, Ermənistan mina xəritələrini siyasi təzyiq aləti kimi saxlayır. Belə ki, xəritələri hissə-hissə verərək Azərbaycandan müəyyən güzəştlər almağa çalışır.

E.Mirzəbəyli qeyd edib ki, Ermənistanda bəzi ərazilər üzrə mina xəritələri var, amma bunların bir çoxu dəqiqlik baxımından zəifdir:

“30 ilə yaxın işğal dövründə minaların çoxu sistemsiz şəkildə basdırılıb. Yəni, döyüş şəraitində və ya müxtəlif dəstələr tərəfindən sistemsiz, dağınıq basdırılmış minalar var. Bu da dəqiq xəritələrin mövcud olmamasına səbəb olub. Azərbaycan rəsmilərinin açıqlamalarına görə, Ermənistandan alınan bəzi xəritələrin dəqiqliyi 25% civarındadır. Yəni, verilmiş xəritələrdə göstərilən yerlərin yalnız az bir hissəsində real minalar aşkarlanır. Həmçinin, qeyri-rəsmi silahlı qruplar və könüllü dəstələr tərəfindən basdırılmış minaların heç bir xəritəsi yoxdur”.

Deputat vurğulayıb ki, bu vəziyyət bölgədə dinc əhalinin həyatı üçün ciddi təhlükə yaradır.

Firuzə Əliyeva

Ermənistan Azərbaycana mina xəritələrini nə üçün vermir?