Azərbaycanla Çin arasında əlaqələrin genişlənməsi müşahidə olunur. Apreldə Azərbaycan prezidenti Çinə rəsmi səfər də edəcək.

Çinlə siyasi və iqtisadi əlaqələrin güclənməsi Azərbaycana nə qazandıracaq?

Mövcud sualla bağlı Sfera.az-a açıqlama verən politoloq Oqtay Qasımov keçən il Azərbaycan ilə Çin arasındakı strateji tərəfdaşlıq haqqında memorandum imzalandığını vurğulayıb.

O bildirib ki, Azərbaycan müstəqillik qazandıqdan sonra xüsusilə Çinlə iqtisadi sahədə əlaqələr genişlənməkdədir:

“Ötənilki bəyannamə tərəflər arasında siyasi münasibətlərin daha da yaxınlaşmasına gətirib çıxaracaq. Bir müddət əvvəl Çin rəsmisi Azərbaycanda səfərdə olub və bir çox görüşlər keçirib. Azərbaycan prezidentinin də Çinə səfəri, əlbəttə ki, iki tərəfli münasibətlərin qurulması baxımından vacib bir səfər olmalıdır. Həmçinin, Pekin dünyanın artıq ikinci qlobal gücünə çevrilir. Onun iqtisadi göstəriciləri ABŞ ilə artıq yaxınlaşmaqdadır və hazırda dünyadakı gedən qlobal mübarizələrdə ilkin rol oynayır.

Bunu nəzərə alaraq, Çin və Azərbaycan arasında iqtisadi sahədə qurulan münasibətlər mövcuddur. Bununla yanaşı, Çinin “Bir kəmər, bir yol” qlobal layihəsinin çəkildiyi coğrafiyalardan biri də Azərbaycandır və Bakı bu layihəni dəstəkləyir. Bu baxımdan Çin və Azərbaycan arasındakı münasibətlərin normallaşması hər iki tərəfin mənafeyi ilə uyğundur. Çin həm də Zəngəzur dəhlizinin açılması ilə bağlı buna mane olan ölkələrə, xüsusən də Ermənistan və İran üzərində təsir göstərə biləcək ölkələrdən biri olaraq müsbət nəticələr əldə edilə bilər”.

Fidan Hacızadə

Azərbaycan və Çinin yaxınlaşması nə vəd edir?