Macarıstanın xarici işlər naziri Peter Siyarto hesab edir ki, Ukraynada sülhün bərqərar olması üçün əsas razılaşmalar Rusiya və ABŞ arasında əldə edilməlidir. Onun sözlərinə görə, Avropa İttifaqı (Aİ) və onun liderləri hələ də münaqişənin davam etməsinə tərəfdar olsalar da, nəhayət, bu razılaşmaları qəbul etməyə məcbur qalacaqlar.

Maraqlıdır, Siyartonun bu sözləri nəyə hesablanıb?

Mövzu ilə bağlı Sfera.az-a açıqlama verən politoloq Kənan Novruzov bildirib ki, Siyarto məsələyə praqmatik yanaşır çünki danışıqlar elə ABŞ və Rusiya arasında gedir.

Onun sözlərinə görə, Siyarto çox peşəkar diplomatdır:

"O, bəzən hadisələri proqnozlaşdıra bilir. Siyartonun bu açıqlaması onu deməyə imkan verir ki, Macarıstan Avropa İttifaqının Ukrayna-Rusiya məsələsinə yanaşması ilə razı deyil. Macarıstan Rusiya ilə yaxınlığı olan dövlətdir. Hazırkı anda Rusiya ilə ABŞ-nin mövqelərinin yanaşması Macarıstanın da bunu dəstəkləməsinə vadar edir. Siyarto Ukraynanın adını çəkməsə də, demək istəyir ki, danışıqlar ABŞ və Rusiya arasında olmalıdır, nəinki Avropa İttifaqı, heç Ukrayna da iştirak etməməlidir".

Politoloq qeyd edib ki, perspektivdə Kiyev-Budapeşt xəttində narazılıqlar arta, həmçinin Aİ-nin Macarıstana münasibətində soyuqlaşma yarana bilər:

"Müəyyən Aİ ölkələri ilə Macarıstan arasında fikir ayrılıqları ola bilər. Bunun da özünü xüsusən iqtisadi məsələlərdə göstərməsi mümkündür. Gələcəkdə Aİ Ukraynaya kömək edə bilər, hətta Böyük Britaniya və Fransa artıq qoşun göndərib. Artıq ABŞ ilə Avropa arasında mübarizə gedəcək. Bu da Ukraynanı daha da pis vəziyyətə salacaq çünki seçim etməli olacaq. Rusiyanın hazırda əli daha güclüdür. Buna görə də ABŞ Rusiya ilə danışmağa çalışır. Ukraynanı isə razı salmaq asandır. Sadəcə Ağ Evdən Ukraynaya dəstəyin dayandırılacağının deyilməsi bəsdir".

K.Novruzov vurğulayıb ki, bu müharibədə hər iki tərəf məğlub olsa da, Rusiya faktiki olaraq uduza bilər.

Onun fikrincə, mümkün sülh sazişindən öncə Zelenski istefa verə və ya bu kimi səbəbdən hakimiyyətdən gedə bilər. Ukrayna tərəfdən sülh sazişinə imza çəkən şəxs Zelenski olmayacaq.

Firuzə Əliyeva

Rusiya və Ukrayna müharibəsinin sonuna onlar qərar verəcək - "Zelenski olmayacaq..."