"Türkiyə ilə qarşıdurma istəmirik" - Saar

İsrailin xarici işlər naziri Gideon Saar Türkiyə ilə qarşıdurma niyyətində olmadıqlarını bildirib. 

Sfera.az “Haber Global”a istinadən xəbər verir ki, o, Qərbi Qüdsdə Avropa İttifaqının (Aİ) Xarici Əlaqələr və Təhlükəsizlik üzrə Ali Nümayəndəsi Kaya Kallasla görüşdən sonra keçirdiyi mətbuat konfransında Türkiyənin Suriyada artan nüfuzu ilə bağlı sualı cavablandırıb.

Saar, Türkiyə ilə nə Suriyada, nə də başqa bir yerdə qarşı-qarşıya gəlmək istəmədiklərini vurğulayıb.

Son dövrlərdə İsrail siyasətində Türkiyənin bölgədəki təsiri əsas müzakirə mövzularından biridir. Hətta baş nazir Benyamin Netanyahunun Türkiyənin Suriyadakı gücünün artması ilə bağlı təhlükəsizlik toplantısı keçirəcəyi bildirilirdi. Lakin toplantının keçirilib-keçirilmədiyi barədə hələ rəsmi açıqlama verilməyib.

Bundan əvvəl İsrail hökuməti eyni mövzuda toplantı təşkil etmiş və baş nazirliyə bağlı Naqel Müdafiə Komitəsi mümkün hərbi qarşıdurma ehtimalı ilə bağlı hesabat hazırlamışdı. Hesabatda İsrailin müdafiə büdcəsinin artırılması və uzaqmənzilli hava hücumu imkanlarının gücləndirilməsi tövsiyə olunurdu.

Fidan Hacızadə