"Heç bir sənəd imzalanmayacaq" - Peskov

"Bu gün Səudiyyə Ərəbistanının Ər-Riyadında görüş üçün toplaşan Rusiya və ABŞ ekspert qrupları danışıqlardan sonra heç bir sənəd imzalamağı planlaşdırmır".

Sfera.az xəbər verir ki, bunu Rusiya prezidentinin mətbuat katibi Dmitri Peskov bildirib.

“Xeyr, heç bir sənəd planlaşdırılmır”,- o, TASS-ın müvafiq sualına cavab verərkən deyib.

Qeyd edək ki, Rusiya və ABŞ arasında danışıqlar bazar ertəsi səhər başlayıb. Rusiya nümayəndə heyətinə Federasiya Şurasının Beynəlxalq Əlaqələr Komitəsinin sədri Qriqori Karasin və Federal Təhlükəsizlik Xidməti direktorunun müşaviri Sergey Beseda başçılıq edir. ABŞ nümayəndə heyətinə Ağ Evin Milli Təhlükəsizlik Şurasının baş direktoru Endryu Pik və Dövlət Departamentinin yüksək vəzifəli əməkdaşı Maykl Anton başçılıq edir. Ukrayna üzrə xüsusi elçi Keyt Kelloqun köməkçiləri və milli təhlükəsizlik üzrə müşaviri Mayk Vals da iştirak edir.

Rusiya prezidentinin köməkçisi Yuri Uşakov deyib ki, məsləhətləşmələrin əsas mövzusu Rusiya və ABŞ prezidentləri Vladimir Putin və Donald Tramp arasında telefon danışığı zamanı əldə olunmuş razılaşmaya əsasən Qara dəniz taxıl təşəbbüsünün bərpasıdır.

Firuzə Əliyeva