Ermənistan təxribatçıları aktivləşdi - Yeni müharibə gözlənilir?
Xəbər verdiyimiz kimi, Azərbaycan və Ermənistan arasında müzakirə olunan sülh sazişiylə bağlı danışıqlar yekunlaşıb.
Lakin, dünən səhər və axşam Ermənistan silahlı qüvvələrinin bölmələri Ordumuzun mövqelərini atıcı silahlarla atəşə tutub. Sülh danışıqlarında ümumi razılığın əldə edilməsindən sonra Ermənistanın bu cür davranmasının səbəbi nə ilə izah oluna bilər?
Sfera.az-a bu barədə açıqlama verən politoloq Oqtay Qasımov Ermənistanın Azərbaycan mövqelərini atəşə tutmasını hazırki vəziyyətə mənfi təsir göstərən amil kimi qiymətləndirib.
Politoloq bildirib ki, bir neçə gün əvvəl tərəflər sülh sazişi ilə bağlı işləri yekunlaşdırdıqlarını bəyan etmişdilər:
“Buna baxmayaraq, tam həll olunmamış bəzi məsələlər qalır. Lakin atəşkəs rejiminin pozulması, sülh sazişi tam şəkildə imzalanana qədər ara-sıra baş verəcək belə təxribatların bir hissəsidir. Bunun bir neçə səbəbi var. Birincisi, Ermənistan cəmiyyətində revanşist meyillər kifayət qədər yüksəkdir. Bu təxribatları törətməklə Ermənistan tərəfi həm də belə bir mesaj verir ki, onların hələ də müəyyən gücü var və müəyyən dərəcədə revanş cəhdləri edə bilərlər. İkincisi, Ermənistan hakimiyyəti iddia edir ki, cəmiyyət tərəfindən Azərbaycanla razılaşmalara getdiyi üçün tənqid olunur. Bu təxribatlar həmin iddiaların əksini sübut etmək cəhdi kimi qiymətləndirilə bilər".
O.Qasımov həmçinin, bu cür addımların Azərbaycanı cavab tədbirləri görməyə vadar edərək, həm prosesin gedişini ləngitmək, həm də beynəlxalq diqqəti süni şəkildə bölgəyə yönəltmək məqsədi daşıdığını vurğulayıb.
Politoloqun sözlərinə görə, bölgədə marağı olan və sülhün imzalanmasını istəməyən qüvvələr var: “Onlar da prosesə mənfi təsir göstərirlər. Bir neçə gün əvvəl Avropa İttifaqının anti-Azərbaycan mövqeyini nəzərə alsaq, bu təxribatların məqsədi həm də Azərbaycanı cavab tədbirlərinə təhrik edərək beynəlxalq diqqəti bölgəyə yönəltmək ola bilər. Ümumilikdə, belə təxribatlar sülh prosesinə mənfi təsir göstərir”.
Fidan Hacızadə
