"Yırtıcı güclərin öhdəsindən güclü liderlə gəlirik" - Sahib Alıyev
"Bütün yırtıcı güclərin üzlərindəki maskanı da çıxarıb atdıqları belə bir mürəkkəb dövrdə çeşidli çağırışların öhdəsindən uğurla gəlməmizin əsas səbəbi düzgün seçim və lider faktoruyla bağlıdır".
Sfera.az xəbər verir ki, bunu Milli Məclisin bu gün keçirilən plenar iclasında deputat Sahib Alıyev deyib.
S.Alıyev vurğulayıb ki, bu gün qarşı tərəfin Azərbaycanın irəli sürdüyü sülh planı ilə hələlik sözdə də olsa razılaşmasının, Paşinyanın röya Ermənistan axtarışına son qoyaraq real Ermənistandan danışmasının arxasında onun öz istəyi yox, dəmir yumruqlu liderimiz cənab İlham Əliyevin diqtəsi durur.
"Bir tərəfdən hərbi potensialımızın getdikcə artması, digər tərəfdən Qarabağdakı quruculuq işləri, məsələn, Xankəndində çağdaş standartlara cavab verən, ali təhsil müəssisəsi olaraq böyük perspektiv vəd edən universitetin açılması, tikiş fabrikinin işə düşməsi, günü-gündən gözəlləşən bu şəhərimizdə artıq minlərlə azərbaycanlının yaşaması öz sözünü deyir və bütün bunlar hökumətin ötənilki fəaliyyətinin qənaətbəxşliliyinin ən gözəl göstəriciləridir",- millət vəkili qeyd edib.
Firuzə Əliyeva
