Paşinyan Azərbaycanla sülh sazişi layihəsinin razılaşdırılmasından DANIŞDI
Azərbaycan və Ermənistan arasında sülh və dövlətlərarası münasibətlərin qurulmasına dair sazişin mətni razılaşdırılıb.
Sfera.az xəbər verir ki, bu barədə Ermənistanın baş naziri Nikol Paşinyan jurnalistlərlə söhbətində bildirib.
Saziş nə vaxt imzalanacaq?
Paşinyan sazişin imzalanma tarixinə toxunaraq qeyd edib: "Artıq bildirmişik ki, sənəd imzalamağa hazırdır. Biz imzalama tarixi və məkanı ilə bağlı müzakirələrə başlamağa hazırıq. Azərbaycanın Xarici İşlər Nazirliyi də bu barədə açıqlama verib və ikitərəfli formatda müzakirələrə başlamağa hazır olduqlarını bildirib. Onların öz fikirləri var, bizim də öz yanaşmamız var. Güman edirəm ki, bu müzakirələr zamanı biz bu fikirləri bir-birinə yaxınlaşdırmağa çalışacağıq".
"Münaqişənin həlli mümkündür"
Paşinyan Ermənistan və Azərbaycanın yaxın perspektivdə sülhə nail ola bilməyəcəyi barədə iddialarla razı olmadığını vurğulayıb: "Əslində, Ermənistan və Azərbaycan arasında sülh üçün ciddi əsaslar yaradılıb. Bu əsaslardan biri də 1991-ci il Almatı Bəyannaməsinə əsasən, hər iki ölkənin bir-birinin ərazi bütövlüyünü və suverenliyini tanımasıdır. Bu, artıq reallıqdır və bu reallıq üfüqdə görünməlidir".
4 illik danışıqlar və konkret nəticələr
O bildirib ki, Bakı və İrəvan dörd ildir ki, sülh prosesi üzrə danışıqlar aparır və bu müddət ərzində konkret nəticələr əldə edilib.
"Bəzi sərhəd ərazilərinin müəyyən edilməsi prosesi artıq başa çatıb. Bəs buradan sonra hansı yolu tutmalıyıq? Əgər biz ardıcıl səylərimizi davam etdirsək, prosesin istiqaməti artıq aydındır. Sülh layihəsi masadadır, əsas məsələ bu layihədən imtina etməməkdir", — deyə Paşinyan vurğulayıb.
