"Tezliklə sülh sazişi olacaq" - Mirzoyan

“Ermənistan və Azərbaycan sülh sazişi layihəsini yekunlaşdırmağa çox yaxındırlar”.

Sfera.az xəbər verir ki, bu sözləri Ermənistanın xarici işlər naziri Ararat Mirzoyan “WION”a müsahibəsində deyib.

“Ermənistan və Azərbaycan arasında normallaşma prosesinə gəlincə, deməliyəm ki, biz buna çox yaxınıq. İki ölkə arasında sülh sazişi layihəsinin yekunlaşmasına az qalıb. Əgər biz layihənin hazırlanmasını yekunlaşdırıb sülh müqaviləsini imzalasaq, bu, Cənubi Qafqazda sülhün və sabitliyin ən güclü sütunlarından biri olacaq. Bu, həm də Azərbaycanla artıq əldə etdiyimiz bəzi başqa danışıqlar və razılaşmaları tamamlayacaq.

Məsələn, biz cəmi bir neçə ay əvvəl iki dövlət arasında sərhədin delimitasiyası ilə məşğul olan sərhəd komissiyalarının işinin nizamnaməsini imzalamağa və sonra ratifikasiya etməyə nail olduq. Onu da qeyd etməliyəm ki, Azərbaycanla artıq əldə etdiyimiz sazişlər ikitərəfli birbaşa danışıqlar yolu ilə həyata keçirilib. Və inanırıq ki, tezliklə sülh sazişinə də nail olacağıq”, - Mirzoyan bildirib.

Firuzə Əliyeva