Ukrayna 30 günlük atəşkəs barədə ABŞ-nin təklifini qəbul edib. Zelenski bildirib ki, əgər Rusiya tərəfi də müvafiq addımı atsa, Ukrayna cəbhə xətti boyunca 30 gün ərzində atəşi dayandıracaq.

ABŞ ilə Ukrayna arasında əldə edilmiş razılığa əsasən, ABŞ kəşfiyyat məlumatlarının ötürülməsini və Ukraynaya hərbi yardımı bərpa edir. Həmçinin, tərəflər kritik minerallar sazişini mümkün qədər tez yekunlaşdırmaq barədə razılığa gəliblər.

Maraqlıdır, Rusiyanın 30 günlük təcili atəşkəs barədə təklifə münasibəti necə ola bilər? Ukraynanın mineral ehtiyatlarının işlənməsi barədə ikitərəfli saziş, həmçinin sülh sazişi tezliklə imzalana bilərmi?

Mövzu ilə bağlı Sfera.az-a açıqlama verən politoloq Aqşin Kərimov bildirib ki, prosesdə dönüş nöqtəsi Rusiya ilə ABŞ-nin potensial razılaşmalar üçün öz şərtlərini diktə etməsi və bunun nəticələri ilə yarana bilər.

Onun sözlərinə görə, ABŞ Prezidenti Donald Tramp Ukrayna və Avropanın təhlükəsizliyi mövzularını Rusiya ilə əməkdaşlıq və rəqabəti müəyyənləşdirəcək təzyiq kimi nəzərdən keçirir:

“Rusiya və ABŞ öz strateji məqsədlərindən geri çəkilmədikcə, tərəflər cəbhə xəttini maksimum mənfəət əldə edəcək manevr sahəsi kimi istifadə edəcəklər. Yəni, ABŞ və Rusiya maksimalist məqsədlərini Kiyevə qəbul etdirmək yolundan geri dönməyiblər. Rusiyanın atəşkəs təklifinə müsbət qarşılıq verməsi belə, cəbhə xəttində etibarlı və uzunmüddətli sabitlik açarı olmayacaq. Çünki Rusiya da, Ukrayna da yaxşı bilir ki, mümkün atəşkəs qüvvələrin toparlanması, dislokasiya yerlərinin dəyişdirilməsi, ordunun komplektləşdirilməsi üçün uyğun vaxt rejimidir. Üstəlik, əgər Vaşinqton prosesi Moskva ilə sövdələşmənin elementi kimi idarə etmirsə, o zaman Rusiya Ukrayna cəbhəsində irəliləyişləri davam etdirməyi optimal variant kimi nəzərdə tutacaq”.

A.Kərimov qeyd edib ki, ABŞ-Ukrayna razılaşmasının məntiqi və etibarlı nəticəsi Donald Tramp və Vladimir Putin danışıqlarından asılıdır:

“Böyük ehtimal, Tramp Ukrayna ilə imzalanması gözlənilən minerallarla bağlı müqavilədən Rusiyaya da pay ayırmağı təklif edəcək. Bu variant onsuz, əvvəldən mövcud idi, ancaq indi Rusiyanın ABŞ-nin Ukraynaya yardım kampaniyasını davam etdirməsi fonunda həmin təkliflərə münasibəti birmənalılıq dərəcəsini itirir.
Putin isə Rusiyanın işğal zonasında olan ərazilərdəki təbii sərvətlərin istismarı üçün ABŞ-yə əməkdaşlıq təkliflərini genişləndirə bilər. Cari gündəm və proseslərdəki ABŞ-Rusiya sövdələşmələrinin ön plana çıxması suverenlik və ərazi bütövlüyü baxımından Kiyevə dividentlər qazandırmır”.

Firuzə Əliyeva

Ukrayna atəşkəs razılığına gəldi, bəs Rusiya? - AÇIQLAMA