Son illərdə dünyada baş verən geosiyasi gərginliklər və münaqişələr Üçüncü Dünya müharibəsinin başlaya biləcəyi ehtimallarını artırıb. Belə bir riskin olduğu indiki şəraitdə ekspertlər, amalitiklər daha təhlükəsiz ərazilərin və ölkələrin axtarışını həyata keçiriblər.

Mütəxəssislər coğrafi mövqe, neytrallıq siyasəti və nüvə təhdidlərindən uzaqlıq kimi amilləri nəzərə alaraq, mümkün müharibə şəraitində sığınmaq üçün ən təhlükəsiz 11 ölkəni müəyyən ediblər.

Sfera.az "Haber7.com"a istinadən ən təhlükəsiz olan 11 məkan haqqında məlumatları təqdim edir:

1. Antarktida. Bura yaşayış üçün uyğun olmasa da dünyanın ən ucqar və əlçatmaz yerlərdən biridir. İnsan məskunlaşmasının az olması və siyasi münaqişələrdən uzaq olması Antarktidanı müharibə zamanı təhlükəsiz bölgəyə çevirir.

2. Argentina. Cənubi Amerikanın nəhəng ölkəsi olan Argentina, qlobal müharibə zamanı qida çatışmazlığı riskindən ən az təsirlənəcək ölkələrdən biri sayılır. Ölkənin geniş əkin sahələri və təbii sərvətləri təhlükəsizlik baxımından üstünlük qazandırır.

3. Butan. Bu ölkə Himalay dağlarının ətrafında yerləşir və illərdir neytrallığını qoruyur. Butan, münaqişələrdən kənar qalması və coğrafi çətinliyi ilə diqqət çəkir.

4. Çili. Uzun sahil xətti, məhsuldar torpaqları və inkişaf etmiş infrastrukturu Çilini təhlükəsiz ölkələr siyahısına daxil edir. Çili də Argentina kimi Avropadan xeyli uzaqda yerləşir.

5. Fici. Sakit Okeanın cənub-qərbində yerləşən ada dövləti mövqeyinə görə qlobal müharibədən uzaq qala biləcək ölkələrdən hesab olunur.

6. Qrenlandiya. Dünyanın ən böyük adası olan Qrenlandiya, az əhalisi və geosiyasi neytrallığı ilə təhlükəsiz məkanlardan biri kimi qiymətləndirilir.

7. İslandiya. Daimi olaraq dünyanın ən dinc ölkələri arasında yer alan İslandiya, enerji müstəqilliyi və təbii ehtiyatları ilə diqqət çəkir.

8. İndoneziya. Qlobal siyasətdə neytrallığı ilə seçilən İndoneziya, bu siyahıya daxil edilən yeganə müsəlman ölkəsidir.

9. Yeni Zelandiya. Dinc siyasəti və dağlıq əraziləri ilə Yeni Zelandiya qlobal münaqişələrdən uzaq qala biləcək ölkələr arasındadır.

10. İsveçrə. Tarix boyu neytrallığını qoruyan İsveçrə, dağlıq ərazisi və təhlükəsizlik tədbirləri ilə müharibə şəraitində ən etibarlı yerlərdən biri hesab edilir.

11. Cənubi Afrika Respublikası. Müasir infrastrukturu, geniş əkin sahələri və su ehtiyatları ilə Cənubi Afrika mümkün münaqişə zamanı təhlükəsiz ölkələr sırasına daxil edilib.

Ekspertlər qeyd edirlər ki, müharibə ssenarisində bu ölkələr coğrafi mövqeləri və siyasi stabillikləri sayəsində digər dövlətlərə nisbətən daha az risk daşıyır.

Bəsti Rəfizadə

Dünya müharibəsi ehtimalı artır: Ən təhlükəsiz ölkələr hansılardır?