NATO-nun qapıları Ukraynanın üzünə bağlandı

ABŞ Prezidenti Donald Tramp Ukraynanın NATO-ya üzvlük imkanlarını dəyərləndirib. Dövlət başçısının sözlərinə görə, Ukrayna NATO-ya üzvlük məsələsini unutmalıdır.

Doğrudan da Ukrayna NATO-ya daxil ola bilməyəcək?

Sfera.az-a açıqlama verən politoloq Fərhad Məmmədov deyib ki, Ukraynanın NATO-ya üzv olması məsələsi artıq bəzi dairələrdə “qapanmış” kimi görünür. O qeyd etdi ki, əvəzində Ukrayna ABŞ ilə iqtisadi sövdələşmələr imzalayaraq, ABŞ-dən təhlükəsizlik qarantiyaları almağa çalışır: “Bu təhlükəsizlik zəmanətləri, xüsusilə ölkənin işğal altındakı ərazilərindəki təbii ehtiyatların işlənməsi ilə əlaqəlidir. Bu ərazilərdə təbii ehtiyatların işlənməsi ABŞ şirkətləri tərəfindən həyata keçiriləcək". 

Politoloqun fikrincə, Ukrayna Avropa ölkələri ilə təhlükəsizlik qarantiyaları barədə də danışıqlar aparır: “Lakin burada vacib bir məsələ var: bu qarantiyalar hansı əraziləri əhatə edir? Əgər dövlət olaraq bu sənəd imzalanırsa, işğal olunmuş ərazilər nəzərdə tutulur. Avropa ölkələrinin ABŞ olmadan bu təhlükəsizlik təminatlarını tam şəkildə təmin etməsi mümkün deyil". 

F.Məmmədov həmçinin vurğulayıb ki, Avropa ölkələri ABŞ olmadan bu təhlükəsizlik qarantiyalarını tam şəkildə təmin edə bilməz: “Ukraynanın NATO-ya üzv olmaq perspektivinin itməsi, ölkənin gələcək təhlükəsizlik və geosiyasi strategiyalarını yenidən formalaşdırmağa məcbur edə bilər”.

Bəsti Rəfizadə