Ermənistan XİN-in sözçüsü Ani Badalyan bildirib ki, Azərbaycandan sülh sazişi layihəsinə cavab alıblar, lakin digər məsələlərdə - kommunikasiyaların blokdan çıxarılması və silahlara qarşılıqlı nəzarət mexanizmi ilə bağlı təkliflərə cavab yoxdur.

Maraqlıdır, cavabda bu barədə qeyd olmamasının əsas səbəbi nədir?

Sfera.az xəbər verir ki, mövzu ilə bağlı açıqlamasında politoloq Asif Nərimanlı bildirib ki, Bakının İrəvana göndərdiyi cavab 17 maddəlik sülh sazişi layihəsinə korrektələrin edilməsindən ibarətdir.

Belə korrektələrin Bakı-İrəvan xəttində uzun müddətdir davam etdiyini vurğulayan A.Nərimanlı tərəflərin son açıqlamaları fonunda 17 maddədən yalnız üçüncü ölkələrə məxsus qüvvələrin sərhəddən çıxarılması ilə bağlı prinsipial razılaşmanın olmadığını qeyd edib.

Ekspert hesab edir ki, İrəvan Avropa İttifaqının müşahidə missiyasının müddətini daha iki il uzatmaqla bu məsələdə razılaşma perspektivini sıradan çıxarıb:

“Saziş layihəsinin bu bənd olmadan imzalanması üçün “alternativ güzəştlər” irəli sürür. Misal üçün, bunlardan brii Minsk qrupunun buraxılması ilə bağlıdır. Mümkündür ki, İrəvan layihədə “üçüncü ölkələrə məxsus qüvvələrin sərhəddən çıxarılması” bəndi ilə bağlı yeniliklər, yaxud əlavə təkliflər daxil edib, Bakının cavabı da bu məsələdə öz korrektələrini əlavə etməkdir. Ermənistanın digər məsələlər dediyi kommunikasiyanın açılması və silahlara nəzarət mexanizmi 17 maddəlik layihəyə daxil deyil. Kommunikasiya ilə bağlı məsələ qarşılıqlı razılaşma ilə layihədən çıxarılıb, silahlara nəzarət mexanizmi isə Ermənistanın Azərbaycan tərəfindən qəbul edilməyən, ümumiyyətlə reaksiya vermədiyi təklifidir”.

A.Nərimanlının sözlərinə görə, İrəvanın diqqəti sazişdən kənar məsələlərə çəkməsi təsadüfi deyil:

“Bu, Bakınının layihədənkənar tələbləri qarşısında Ermənistan konstitusiyasının dəyişdirilməsi, kontr-gediş etmək, gündəliyi genişləndirərək, masada mövqelərini qorumaq məqsədi daşıyır. Cavab və kontr-cavab müstəvisində davam edən sülh sazişi layihəsinin 2025-ci ildə də imzalanması perspektivləri zəifləyir”.

Firuzə Əliyeva

Ermənistanı sülh müqaviləsində narazı salan nədir?