Bu gün Xocalı soyqırımının törədilməsindən 33 il ötür. 1992-ci il fevralın 26-da Ermənistan silahlı qüvvələri tərəfindən Xocalıda dinc Azərbaycan əhalisinə qarşı törədilmiş qətliam tarixin ən dəhşətli faciələrindən biri kimi yadda qalıb.

Lakin ötən illər ərzində nə Ermənistan hakimiyyəti, nə də erməni cəmiyyəti bu qətliama görə üzr istəyib.

Mövzu ilə bağlı Sfera.az-a açıqlama verən politoloq Kazım Kazımov hesab edir ki, Ermənistanın Xocalı faciəsinə görə üzr istəməsi üçün ilk növbədə sülhə hazır olması vacibdir, lakin hazırkı vəziyyətdə bunun real olmadığı görünür. Onun sözlərinə görə, Ermənistan cəmiyyətində, eləcə də ölkənin iqtidarında və müxalifətində revanşist meyillər hələ də güclüdür.

“Onların Konstitusiyalarında da, siyasətçilərin nitqlərində də açıq şəkildə görürük ki, hələ də Azərbaycana qarşı nifrət var və Azərbaycanın ərazi bütövlüyünü tanımamaq istəyi qalır. Ermənistan yenə də Azərbaycanla sülh müqaviləsi imzalamaqdan çəkinir. O ki qaldı Xocalı faciəsinə dair həqiqətləri qəbul etmələrinə, mən hesab edirəm ki, bu, yaxın illərdə mümkün görünmür. Çünki onlar nəinki Xocalıdan dərs çıxarıblar, əksinə, imkanları olsaydı, İkinci Qarabağ müharibəsində də eyni vəhşilikləri törədərdilər”, – deyə Kazım Kazımov vurğulayıb.

Ekspertin fikrincə, 2020-ci ildəki müharibə zamanı Ermənistanın Tərtər, Bərdə və Gəncəyə raket zərbələri endirməsi də onların mülki əhaliyə qarşı eyni təcavüzkar siyasəti yürütməsinin sübutudur. K.Kazımov əlavə edib ki, Azərbaycan Ordusu onlara layiqli cavab verərək düşmənə sarsıdıcı zərbə endirib:

"Bu gün Azərbaycan dünyaya bəyan edir ki, artıq 1992-ci ilin Azərbaycanı deyil. Xocalı kimi faciələrin bir daha yaşanmaması üçün güclü dövlət və qüdrətli ordu hər zaman vətəndaşlarımızın təhlükəsizliyini təmin edəcək. Ermənistanın üzr istəməsi üçün isə təkcə zaman deyil, həm də ciddi siyasi və ideoloji dəyişikliklər lazımdır".

Xatırladaq ki, 1992-ci il 26 fevral tarixində Xocalı şəhərində 613 nəfər mülki insan, o cümlədən 106 qadın, 63 uşaq və 70 yaşlı şəxs qətlə yetirilib. Eyni zamanda, 1000-ə yaxın insan yaralanıb, 1275 nəfər isə əsir götürülüb və işgəncələrə məruz qalıb. 150 nəfərin taleyi hələ də məlum deyil.

Xocalı şəhərindəki əhalinin çoxu məcburi köçkün vəziyyətinə düşüb. Hücum nəticəsində 25 minə yaxın insan öz evlərini tərk edərək müxtəlif bölgələrə sığınıb. Beynəlxalq hüquqda, xüsusilə BMT-nin 1948-ci il Soyqırımı Konvensiyası və 1998-ci il Roma Statutu, soyqırımlarını və insanlıq əleyhinə cinayətləri açıq şəkildə qadağan edir. Bu baxımdan, Xocalı soyqırımı insanlıq əleyhinə cinayət və etnik təmizləmə kimi qiymətləndirilməlidir.

Bəsti

Ermənistan Xocalı qətliamına görə üzr istəyəcək? - AÇIQLAMA