Rusiya Prezidenti Vladimir Putin VGTRK-nın müxbiri Pavel Zarubinlə görüşüb.

Sfera.az TASS-a istinadən Rusiya prezidentinin əsas bəyanatlarını təqdim edir:

Dövlət başçısı amerikalı həmkarı Donald Trampın Kiyevin hazırkı hakimiyyətİ ilə bağlı mövqeyini rasional adlandırıb və Ukraynada seçkilərin onun dövlətçiliyinin qorunub saxlanmasına kömək edəcəyi barədə fikirlərini bildirib.

Putin qeyd edib ki, Rusiya nadir torpaq metal ehtiyatlarına görə dünyada şəksiz liderlərdən biridir:

“Bizim bu ehtiyatlarımız şimalda, Murmanskda və Qafqazda, Kabardin-Balkarda, Uzaq Şərqdə, İrkutsk vilayətində, Yakutiya və Tıvada var. Nadir torpaq metalları müasir iqtisadiyyatın ən mühüm resurs bazasıdır. Biz indiyədək bu istiqamətdə kifayət qədər iş görməmişik. Biz daha çox iş görməliyik. Rusiya nadir metallar sənayesində istənilən xarici tərəfdaşlarla, o cümlədən amerikalı tərəfdaşlarla işləməkdən məmnun olardı. Moskva amerikalı və digər xarici partnyorlara nadir torpaq mədənləri layihələrində, o cümlədən Donbassda və Novorossiyada iştirakı təklif etməyə hazırdır. Orada da müəyyən ehtiyatlar var. Biz orada tərəfdaşlarımızla, o cümlədən amerikalılarla işləməyə hazırıq.

Rusiya və ABŞ alüminium istehsalı üzrə birgə işi də nəzərdən keçirə bilər. Məsələn, Krasnoyarsk vilayətində hələ sovet dövründə yeni su elektrik stansiyasının tikintisi və əlavə alüminium istehsalı müəssisələrinin yaradılması nəzərdə tutulurdu. Əgər Amerika şirkətləri Rusiyada işləsələr, onlar layiqli qazanc əldə edəcəklər və müvafiq miqdarda alüminium daxili bazara tamamilə məqbul bazar qiymətləri ilə çatdırılacaq. Burada düşünməli çox şey var”.

Rusiya lideri vurğulayıb ki, ABŞ-Ukrayna arasında nadir metallar və digər ehtiyatlar üzrə gözlənilən saziş Rusiyaya heç bir şəkildə təsir göstərmir:

“Təbii ki, bu resursun nə dərəcədə real olduğunu, nə qədər baha başa gəldiyini və s. qiymətləndirmək lazım idi. Rusiya və ABŞ şirkətləri Ukrayna tənzimlənməsi çərçivəsində iri iqtisadi layihələri müzakirə edirlər. Bəzi şirkətlərimiz bir-biri ilə əlaqə saxlayır və bu cür layihələri müzakirəyə çıxarırlar".

Dövlət başçısının sözlərinə görə, ABŞ Prezidenti Donald Trampın Kiyev hakimiyyəti ilə bağlı hərəkətləri emosiyalara deyil, rasional soyuq hesablamaya, “mövcud vəziyyətə rasional yanaşmaya” əsaslanır:

"O, irəli gedə və münaqişənin həlli istiqamətində işləyə bilər. Bu məncə, onun xarakterindədir. O, düz və çox utanmadan hərəkət edir. Onun özünəməxsus mövqeyi var. Tramp təkcə nə düşündüyünü demir, həm də istədiyini deyir. Bax, bu, liderin, böyük liderlərdən birinin imtiyazıdır".

Rusiya və ABŞ-nin Ukraynada tezliklə sülhə nail olmaq istədiyini vurğulayan Putin rejimin hazırkı rəhbərinin bu məqsədə mane olduğunu deyib:

“Volodimir Zelenski Ukraynanın parçalanması faktorudur, Tramp bunu dərk edir və orada siyasi mühiti canlandırmaq, Ukrayna dövlətinin sağ qalmasına şərait yaratmaq istəyir. Ümumiyyətlə, bu, Rusiyanın xeyrinə deyil, indiki rejimlə münaqişəmiz var, bu isə Ukraynanın özünün xeyrinədir. Volodimir Zelenski əsassız olaraq yüksək itkilərə səbəb olan hərbi deyil, siyasi mülahizələrin diktə etdiyi gülünc əmrlər verir. Rusiya Ukrayna dövlətçiliyinin qorunub saxlanmasının əleyhinə deyil, lakin ölkədən düşmən körpübaşı kimi istifadə edilməməlidir. Belə ki, o, sonda dost qonşu dövlətə çevrilsin. Volodimir Zelenskinin hakimiyyətdə qalması Rusiyaya fayda versə də, Ukrayna xalqının etimadını qazanan insanları hakimiyyətə gətirmək Ukrayna dövlətçiliyinin marağındadır”.

O qeyd edib ki, Volodimir Zelenski danışıqlardan çəkinir:

“Çünki bu danışıqlar gec-tez başlasa, çox güman ki, tezliklə hərbi vəziyyətin ləğvi zərurətinə səbəb olacaq. Və bu baş verən kimi dərhal seçkilərin keçirilməsi zəruri olacaq. Zelenski bütövlükdə cəmiyyət üçün zəhərlidir. Bunu Radada (Ukrayna parlamenti – red.) onun səlahiyyətlərinin uzadılması ilə bağlı keçirilən səsvermə sübut edir. Ukraynanın keçmiş ali hərbi komandiri Valeri Zalujnının reytinqi Volodimir Zelenskidən iki dəfə yüksəkdir”.

Putin vurğulayıb ki, Rusiya BRİKS tərəfdaşlarının Ukrayna ilə bağlı təşəbbüslərinə hörmətlə yanaşır:

"Mən bu gün Çin prezidenti ilə bu barədə danışdım. Moskva Aİ-nin Ukrayna nizamlanmasında iştirakına qarşı deyil, digər ölkələrin mövqeyini vacib sayır. Biz isə buna hörmətlə yanaşırıq. Avropa ölkələrinin hazırkı liderləri Kiyev rejiminə bağlıdırlar. Onlar isə həddən artıq çox şeylər deyiblər və vədlər veriblər. İndi isə onlar üçün simasını itirmədən bu vəziyyətdən çıxmaq çox çətindir və ya praktiki olaraq mümkün deyil".

Firuzə Əliyeva

"Tramp böyük liderdir, Zelenskinin yerinə isə..." - Putindən BƏYANAT