ABŞ Prezidenti Donald Tramp nüvə silahından istifadəni və nüvə gücləri klubunun genişləndirilməsini qəbuledilməz hesab edib. Tramp beynəlxalq ictimaiyyəti nüvə müharibəsinin qarşısını almağa çağırıb. ABŞ-nin nüvə başlıqlarının sayını azaltmaq üçün Rusiya və Çinlə danışıqlar aparmasının tərəfdarı olduğunu bildirib.

Bu bəyanat Çin və Rusiya tərəfindən necə qarşılana bilər? Nüvə müharibəsi ehtimalı nə qədər yaxın və real görünür?

Mövzu ilə bağlı Sfera.az-a danışan politoloq Samir Hümbətov bildirdi ki, nüvə silahlarının sayının azaldılması ilə bağlı əvvəllər də təkliflər irəli sürülüb:

"Bu gün Rusiya təxminən 7500-dən çox, ABŞ isə 5000-dən artıq nüvə başlığına malikdir. Nüvə silahlarının saxlanması, eyni zamanda böyük bir maliyyə yükü yaradır. Mütəxəssislərin hesablamalarına görə, yalnız bu silahların saxlanmasına ildə 82 milyard dollardan çox vəsait xərclənir.Trampın bu mövzuda çıxış edərək, nüvə güclərinin sayını azaltmağa və bununla da nüvə müharibəsi ehtimalını azaltmağa çağırması dünya miqyasında böyük əhəmiyyət daşıyır".

Politoloq qeyd edib ki, Çin və Rusiyanın ABŞ-nin bu istəyini qarşılayıb-qarşılamayacağı hələ də sual altındadır:

"Bu tələbə yalnız tərəflərin maraqlarına uyğun olduğu halda müsbət cavab verilə bilər. Rusiya və Çin nüvə silahlarının sayını azaltmaq istəməyəcəklərini və strateji üstünlüklərini qorumağa davam edə biləcəklərini bildirirlər. Hər iki ölkə üçün nüvə silahları həm milli təhlükəsizlik, həm də beynəlxalq güc balansı baxımından vacibdir. Bu səbəbdən, ABŞ-nin təkbaşına nüvə silahları ilə bağlı belə bir razılaşma əldə etməsi çətin ola bilər".

Ülkər Abdurahmanlı

"Çin və Rusiya ABŞ-nin bu istəyini qəbul etməyəcək" - AÇIQLAMA