"Bəzi ölkələr Rusiyaya qarşı hərəkətə keçə bilər" - POLİTOLOQ
Ukrayna Prezidenti Volodimir Zelenski Britaniyanın “The Guardian” nəşrinə müsahibəsində maraqlı bir iddia ilə çıxış edib. Dövlət başçısı qeyd edib ki, Rusiya ordusu əsgər sayını 150 min nəfər artırmaqla Belarusdan Polşa və Litvaya hücum edə bilər.
Zelenski mümkün hücumun qarşısını almaq üçün Ukraynaya dəstəyin vacib olduğunu deyib. Onun sözlərinə görə, Ukraynaya dəstək əslində Avropanın müdafiəsini təmin etmək deməkdir. Zelenski iddia edib ki, əgər dəstək yetəri qədər olmasa, Rusiya 2025-ci ilin yay və ya payızında Belarusda təlimlərə, bunun ardınca isə tam miqyaslı işğala başlayacaq.
Zelenskinin Rusiyanın yeni hücum taktikası ilə bağlı iddiası nə dərəcədə real görünür? Belə bir iddia NATO nu hərəkətə gətirə bilərmi?
Məsələ ilə bağlı Sfera.az-a açıqlama verən politoloq Məhəmməd Əsədullazadə Rusiyanın Polşa və Baltikyanı ölkələrə hücumunun indi real olmadığını bildirdi.
O xatırlatdı ki, adıçəkilən Avropa ölkələri NATO-nun üzvü olduqlarından onlara hücum NATO-nın sərhədlərini keçmək anlamını verəcək. Politoloq bu halda Rusiyanın bütün NATO-ya üzv olan güclərlə hərbi qarşıdurma vəziyyətinə düşəcəyini dedi.
“Bunu isə Rusiya istəməz”, - deyən M.Əsədullazadə bu hücumun yalnız bir halda mümkün olacağını da söylədi:
“Əgər ABŞ Prezidenti Donald Tramp Ukraynanın şərqini Rusiyaya güzəştə gedərsə, Rusiyanın iştahası artacaq və daha böyük torpaqlara iddia edəcək.
Yalnız bu halda Rusiya Polşa və Balyikyanı ölkələrin təhlükəsizliyinə ciddi təhdid yaradacaq. Putin hələ ki, öz şərtlərini diqtə etməyə çalışır. Putinin tələbinə əsasən NATO Şərqi Avropadan geri çəkilməlidir, Ukrayna NATO-ya üzv olmamalıdır. Əgər Tramp Putin şərtlərinə əməl edərsə, düşünürəm ki, Rusiya Şərqi Avropa ölkələrinə hücum edib, onların təhlükəsizliyinə təhdid yaradacaq”.
Politoloq hesab edir ki, Tramp Putinin şərtlərini qəbul edərsə, bu, ABŞ ilə Avropa arasında fikir ayrılığı yaradacaq:
“Ukraynada baş verənlər ciddi fikir ayrılığı yaradarsa, bu, NATO-nun parçalanmasına da gətirib çıxara bilər. Əslində bu, Putinin strateji planıdır. Əgər ABŞ-nin geri çəkilməsindən sonra Rusiya daha da irəli gedərək Polşa və Baltikyanı ölkələrə hücum edərsə, Avropanın böyük ölkələri seyirci olmayacaq. Ən pis variantda Avropa ölkələrindən Fransa, Almaniya, Böyük Britaniya və İtaliya Rusiyanın bu hərbi təcavüzə qarşı hərəkətə keçə bilər”.
Vasif
