Donald Tramp və Vladimir Putin arasında telefon danışığından sonra dünya ictimaiyyətində müharibənin sülh yolu ilə həllinə dair ümidlər artıb.

Amma münaqişənin sülh yolu ilə həllinə dair ümidlər artsa da, problemin necə həll ediləcəyi ilə bağlı suallar qalmaqdadır. Əsas suallar ondan ibarətdir ki, Rusiya işğal etdiyi ərazilərdə qalacaqmı, yoxsa ərazilərin bir hissəsi geri qaytarılacaq, eləcə də Ukrayna NATO-ya üzv ediləcəkmi?

Sfera.az xəbər verir ki, “Bloomberg” sülhün hansı şərtlər əsasında bağlana biləcəyi ilə bağlı ehtimallarını yazıb. Nəşrin proqnozuna görə, sülh müqaviləsi üçün tərəflər 3 variantdan birini qəbul edə bilər.

“Bloomberg” Ukraynada hadisələrin inkişafı üçün üç mümkün ssenarini araşdırıb. Ən çox ehtimal olunan ssenariyə görə, işğal olunmuş ərazi yaxın gələcəkdə Rusiyanın nəzarəti altında qalacaq. Kiyevin ələ keçirdiyi Kursk vilayətindəki torpaqların Ukraynanın işğal altındakı torpaqlarla mübadiləsi də mümkündür. Bu variantda Ukrayna müəyyən təhlükəsizlik zəmanətləri alacaq və NATO-ya üzvlük təxirə salınacaq.

İkinci variant Kiyev üçün ən əlverişli olanıdır. Bu varianta görə Moskva sövdələşmədən geri çəkiləcəyi təqdirdə ABŞ və Avropanın ikitərəfli öhdəliyi yaranacaq. Yəni, Qərbin Ukraynada Rusiya ilə birbaşa münaqişə girmə ehtimalı üzə çıxacaq. Lakin o da mümkündür ki, Qərb özü birbaşa müharibəyə girməsə də Kiyevə hərbi dəstəyi artıracaq və Rusiyaya qarşı sanksiyaları daha da ağırlaşdırılacaq. Bu variantda Ukraynaya müdafiə sənayesini inkişaf etdirilməsi də həllini tapacaq.

Ukrayna üçün ən pis ssenari üçüncü variantda öz əksini tapa bilər. “Bloomberg”ə görə bu variantın reallaşması üçün ABŞ-nin Ukraynanın gələcəyinə marağını itirməsi lazımdır. Bu vəziyyətdə ABŞ Ukraynaya hərbi və maliyyə yardımını kəsə və problemi həll etməyi avropalıların öhdəsinə buraxa bilər. Üçüncü variant Rusiyanın qazanclarını artıracaq, Ukrayna ərazisinin böyük hissəsinə daimi nəzarət Rusiyanın əlinə keçəcək və Kiyev heç zaman NATO-ya daxil olmayacaq.
Bu variant reallaşarsa, Baltikyanı ölkələr də Rusiyanın hədəfinə çevriləcək.

Vasif

Rusiya-Ukrayna müharibəsini bitirən 3 ssenari: Putin və Tramp hansını seçəcək?