"PKK Öcalanı lider kimi qəbul etməyəcək, çağırış etsə belə..." - ŞƏRH

PKK terror təşkilatının lideri Abdullah Öcalanın təşkilatı silahlı mübarizəni dayandırmağa və ya tərksilah olmağa çağıracağı gözlənilir.

Bu barədə Türkiyənin müxalif Xalqların Bərabərliyi və Demokratiya Partiyasının (DEM) həmsədri Tülay Hatimoğulları məlumat verib.

Maraqlıdır, PKK Öcalanın çağırışı ilə tərkisilah olacaqmı? İllərdir həbsxanada olan Öcalanın azadlığa çıxma ehtimalı nə qədərdir? 

Mövzu ilə bağlı Sfera.az-a açıqlama verən politoloq Aqşin Kərimov bildirib ki, Türkiyənin Suriyada öz profilini yüksəltdikdən və Yaxın Şərqdə portfelini siyasi aktivlərlə doldurdurmasından sonra Abdullah Öcalanın azadlığa buraxılma çağırışları diqqət çəkməkdədir: 

“Türkiyə Yaxın Şərq regionunda özünə qarşı formalaşdırılmış silahlı və siyasi kürd koalisiyasının tənzimlənməsi və yaxud da kürdlərin silahlı mübarizəsinə son qoyulmasını prioritet kimi öz xarici siyasətinin mərkəzinə gətirir. Türkiyə regionda problemli məsələlərin qalmasında maraqlı deyil. Buna görə də Öcalanın azadlığa buraxılması birinci növbədə Türkiyənin sabitliyi və təhlükəsizliyi baxımından əhəmiyyətə malik bir bəyanat kimi diqqət çəkir.

Digər tərəfdən isə Öcalan azadlığa buraxılsa, PKK-nın Suriya və İraqdakı qanadı həmin şəxsi lider kimi qəbul etməyəcək. Belə olacağı təqdirdə, Türkiyə dövləti öz koordinasiyası altında Öcalanı Suriya və İraqdakı kürd koalisiyasına qarşı ayaqlandırmaqla yeni nəticələr əldə etməyə çalışacaq”.  A.Kərimovun sözlərinə görə, Abdullah Öcalanın azadlığa buraxılması zaman-zaman gündəmə gəlsə də, bu məsələ reallaşmamış qalır:  “Hərçənd görünür ki, Öcalan fiquru hələ də Türkiyənin gələcək mübarizə strategiyası üçün faktor olaraq qalmaqdadır. Bununla belə, danışıqlar elə bir əhəmiyyət vermədiyindən Öcalanın azadlığa buraxılması indi üçün öz aktuallığını bir qədər itirmiş sayıla bilər. Yaxın perspektivdə isə bu məsələlər yenidən gündəmə gələcək və o, azadlığa buraxılarsa, Türkiyə öz strategiyasını yenidən müəyyənləşdirərək Yaxın Şərq regionunda öz hegemoniyasını gücləndirəcək”.

  Firuzə Əliyeva