Avropa İttifaqının (Aİ) Ermənistandakı "müşahidə" missiyası Qazax və Qubadlı rayonu istiqamətinə gəlib. Rəsmi Bakı bununla bağlı dəfələrlə narazılığını bildirib, onun Azərbaycanla razılaşdırılmadan fəaliyyət göstərdiyini bəyan edib.

Xəbərdarlıq xaricində Rəsmi Bakı bu fəaliyyətə qarşı hansı diplomatik addımları ata bilər?

Mövzu ilə bağlı Sfera.az-a açıqlama verən siaysi şərhçi Kənan Novruzov bildirib ki, Aİ Azərbaycan ərazilərini göstərişli şəkildə müşahidə etməklə özünün destruktiv mahiyyətini bir daha ortaya qoymuş olur.

K.Novruzov qeyd edib ki, onlar dövlətimizi təxribata çəkməyə çalışırlar:

“İlk “missiya” yaradılanda Aİ ilə Azərbaycan arasında razılaşma olmuşdu, lakin ikinci dəfə olmadı. Bunun özü ən azı diplomatik etika qaydalarına uyğun deyil. Azərbaycanla razılaşdırılmadan Azərbaycan sərhədində içində hərbi və kəşfiyyat elementləri olmasına baxmayaraq, dırnaq arasında mülki deyilən “missiya” göndərilməsi onu göstərir ki, Aİ Azərbaycanla münasibətdə adekvat deyil, onun fikrini nəzərə almayaraq öz riyakar mövqeyini ortaya qoyur. Aİ-nin “missiyası” özünün ilkin mahiyyət və məramına təmamilə ziddir. Onlar regionda növbəti gərginliyə rəvac verilməsinə çalışırlar. Bu addımlar bilərək gərginlik yaratmağa, Azərbaycanla münasibətləri korlamağa, Azərbaycanın hansısa adekvat tədbir görməsinə və bundan sonra onların onsuz da davam edən “səlib yürüşləri”ni daha da gücləndirmələrinə hesablanıb”.

Müsahibimizin sözlərinə görə, bu vəziyyətdə Azərbaycan müəyyən mənada soyuqqanlı davranmalıdır:

“Bəlkə də cavab verməmək ən yaxşı cavab olar. “Missiya”nın tərkibində olan kəşfiyyat elementləri vasitəsilə Ermənistana məlumatların ötürülməsi, bəlkə də Ermənistanın növbəti toqquşmaya hazırlaşdırılması mümkündür. İndiki məqamda Rəsmi Bakının ciddi bir tədbir görməyə ehtiyacı yoxdur. Azərbaycan onsuz da öz işini görür, müxtəlif səviyyələrdə Ermənistan və Aİ-nin regionla bağlı planları barədə məlumatı var. Şübhəsiz ki, preventiv tədbirlər də hazırlanır. Azərbaycan bütün ssenarilərə hazırdır. O baxımdan, indiki məqamda missiya ilə bağlı nə isə ciddi bir addım atmaq, əksinə bəlkə də ziyanımıza olar, Aİ-nin perspektivdə ölkəmizə qarşı əlini gücləndirər”.

Firuzə Əliyeva

Aİ-nin missiyası yenidən sərhədimizdə: Azərbaycan hansı addımları atacaq? - AÇIQLAMA