Məlum olduğu kimi, Rusiyanın “Rossotrudniçestvo” təşkilatının Azərbaycandakı nümayəndəliyinin fəaliyyəti dayandırılıb. Bu qurum Azərbaycanda casus şəbəkəsi yaratmaqda ittiham olunur.

Dünən “Qafqazinfo”da sözügedən şəbəkədə iştirak etdiyi iddia olunan bir neçə məmurun adı çəkilib. Belə ki, həmin şəbəkəyə Prezident Administrasiyasının keçmiş rəhbəri Ramiz Mehdiyevin rəhbərlik etdiyi, sabiq nazirlər Əbülfəs Qarayev, Azad Rəhimov, Elmar Məmmədyarov və Eldar Mahmudovun isə məclislərdə iştirak etdiyi qeyd olunub.

Bu gün müxtəlif saytlar siyahıda adı olanlarla əlaqə saxlayıb. Əbülfəs Qarayev yazılanların mənasız söhbət olduğunu deyib, Ramiz Mehdiyev “axmaq söz-söhbət” adlandırıb, Elmar Məmmədyarov isə onu Moskva ilə əlaqələndirmək üçün heç bir tutarlı səbəb və əsas olmadığını bildirib.

Maraqlıdır, siyahıda başqa kimlərin adı ola bilər və həmin şəxslərlə bağlı araşdırmalara başlanıla bilərmi?

Mövzu ilə bağlı Sfera.az-a açıqlama verən REAL Partiyasının sədr Natiq Cəfərli bildirib ki, bu barədə dövlət orqanları araşdırma etməlidir:

“Onsuz da ölkədə Rusiyaya xidmət edən V kolonun olması məlum idi. İstintaq orqanlarına vaxt vermək lazımdır ki, həmin şəxsləri üzə çıxarsınlar. Bu məsələdə ad çəkmək çətindir. Məlumatı olmayan, informasiya çıxışı məhdud şəxslərin ehtimallar üzərindən danışması kimlərisə şühbə altına sala bilər”.

Firuzə Əliyeva

Rusiyaya işlədikləri iddia olunan məmurlarla bağlı araşdırmalara başlanılacaq? - AÇIQLAMA