ABŞ İrana qarşı yenidən təzyiqləri artırmağa hazırlaşır. Hətta fevralın 4-də Tramp İrana qarşı ABŞ-nin maksimum təzyiqinin bərpası haqqında fərman imzalayıb.

ABŞ-nin İrana qarşı maksimum təzyiq siyasətinin yenidən başlaması regionda hansı nəticələrə gətirib çıxara bilər? Bu proseslərin Azərbaycana təsiri necə ola bilər?

Mövzu ilə bağlı Sfera.az-a açıqlama verən siyasi şərhçi Məhəmməd Əsədullazadə bildirib ki, Trampın İrana qarşı sanksiyaları genişləndirməsi, Xameneinin Trampla danışıqların üzərindən xətt çəkməsi tərəflər arasında münasibətlərin kəskinləşməsinə səbəb olub:

“İsrail Baş naziri Netanyahu Amerikaya səfər etmişdi, ABŞ-ni Trampın İrana qarşı hərbi əməliyyatlar keçirməsinə qarşı inandırmağa çalışdı. Lakin görünür ki, Tramp hələ də diplomatik addımlara üstünlük verir, müqavilə imzalamağa çalışır. İran isə Trampa inanmır. Düşünürəm ki, sanksiyalar genişlənəcək, hətta İsrailin də İrana müəyyən lokal hərbi əməliyyatlar keçirməsi də istisna edilmir. ABŞ ilə İran arasında genişmiqyaslı müharibənin isə başlanması gözlənilmir. Tramp müharibədə maraqlı deyil, sadəcə sanksiyalar ilə İranın neft və qaz ixracını tamamilə iflasa uğrada bilər”.

M.Əsədullazadənin fikrincə, İranın izolasiya olunması Azərbaycanın təhlükəsizlik maraqlarına cavab verir:

“İranın zəifləməsi ölkəmizə qarşı təzyiqlərinin neytrallaşmasına gətirib çıxaracaq. Bu mərhələdə Azərbaycan zərər görməyəcək, əksinə daha da qazanclı olacaq. Zəngəzur dəhlizi məsələsi ilə bağlı İranın mövqeyi kifayət qədər zəifləyəcək”.

Firuzə Əliyeva

"ABŞ İrana qarşı sanksiyaları genişləndirəcək, İsrail isə..." - ŞƏRH