Azərbaycanda “Rus Evi”nin bağlanması qərarından sonra Rusiyada azərbaycanlıları qovmaq, diaspor üzvlərini həbs etmək, onları Novaya Zemlyaya sürgün etməklə (Yeni Torpaq) bağlı çağırışlar edilir. Belə bir təkliflə hər zaman nifrət dolu açıqlamaları ilə tanınan ictimai fəal Sergey Mantsayev çıxış edib.

Azərbaycanla Rusiya arasındakı gərginliyi də nəzərə alsaq, çağırışlar fonunda azərbaycanlılar, diaspora üzvlərimiz üçün real təhlükə yarana bilərmi?

Bununla bağlı Sfera.az-a açıqlama verən politoloq Əlimusa İbrahimov deyib ki, Rusiyada Azərbaycan əleyhinə olan qüvvələrin – siyasi xadimlərin, siyasətçilərin və.s olduğu heç kimə sirr deyil:

“Onlar zaman-zaman Rusiya ilə Azərbaycan arasında olan münasibətlərin gərginləşməsindən istifadə edərək öz xəbis niyyətlərini həyata keçirirlər. Bunu dəfələrlə Ermənistan-Azərbaycan, Ermənistan-Rusiya münasibətlərində də görmüşük. Bu gün də AZAL təyyarəsinin Rusiya tərəfindən vurulması hadisəsindən istifadə edərək ölkəmizə qarşı onların sərsəm fikirlər bildirməsinin şahidi oluruq. Bu, gözlənilən idi. Düşünürəm ki, bu, uzun müddət, yəni Rusiya ilə Azərbaycan arasında münasibətlər normallaşana kimi davam edəcək. İki ölkə arasında münasibətlər isə bu gün gərgindir. Buna da səbəb Rusiyanın öz günahını boynuna almaq istəməməsidir. Rusiya niyə məsuliyyəti öz üzərinə götürmək istəmir? Təbii ki, bunun bir sıra səbəbləri var... Amma burada bizi maraqlandıran əsas məsələ Rusiya- Azərbaycan münasibətləri gərginliyinin hansı səviyyəyə qalxa bilməsidir. AZAL hadisəsi iki ölkə arasında əlaqələrin tamamilə kəsilməsinə, dostluq səviyyəsində olan münasibətlərin düşmənçilik münasibətlərinə çevrilməsinə səbəb ola bilərmi? Bizi bu gün düşündürən əsas məsələ budur. Əlbəttə, hər iki ölkə münasibətlərin düşmənçilik səviyyəsinə keçməsində maraqlı deyil. Rusiyada Azərbaycana qarşı yaradılan bu ajiotaj isə məhz ölkəmizi haqlı iddialarında əl çəkməyə məcbur etmək məqsədi güdür”.

Müsahibimiz bildirdi ki, Azərbaycan öz hüquqlarını sona qədər müdafiə edəcək:

“Qeyd etdiyim kimi, bu münasibətlərin gərginliyindən, təkcə Azərbaycan deyil, eyni zamanda Rusiya da ciddi ziyan çəkir. Hazırda Rusiyanın Ukrayna ilə başlatdığı müharibə səbəbindən onun ətrafındakı ölkələr getdikcə daralır. Düşünmürəm ki, Rusiya bu gün onun üçün kritik olan vəziyyətdə Azərbaycanı da itirmək istəsin. Azərbaycana qarşı Rusiyanın əlində müəyyən mexanizmlər var, o cümlədən də Rusiyada yaşayan azərbaycanlılar məsələsi, diaspora nümayəndələri və.s. – onlara qarşı göstəriləcək tədbirlər.. Amma Moskva bu mexanizmdən istifadə edəcəkmi? Düşünmürəm ki, ediləcək. Ona görə ki, Rusiyanın məqsədi Azərbaycanla münasibətləri daha da gərginləşdirmək deyil, məqsəd sadəcə Azərbaycan tərəfinin müəyyən qədər geri çəkilməsidir. Amma dövlətimizin bundan geri çəkiləcəyini də fikirləşmirəm. Əgər Rusiya qeyd olunan sahələrdə - diaspora, orada yaşayan azərbaycanlılarla bağlı daha ciddi tədbirlərə əl atarsa, təbii ki, Azərbaycan da öz tərəfindən Rusiyaya qarşı müəyyən mexanizmləri işə sala bilər. Bu tədbirlər isə heç də Rusiyanın ürəyincə olmayacaq. Məhz bu səbəbdən, Rusiya bu və ya digər formada Azərbaycanla münasibətləri qaydaya salmaq istiqamətində addımlar atacaq. Amma hansı formada edəcək, bu məlum deyil. Rusiya AZAL təyyarəsinin vurulması ilə bağlı məsələni boynuna götürüb üzr istəməsə, kompensasiya ödəməsə, günahkarları cəzalandırmasa, düşünmürəm ki, Azərbaycan mövqeyindən, tələblərindən geri çəkiləcək. Fikrimcə, Azərbaycan sona qədər öz tələblərində dayanacaq. Amma münasibətləri normallaşdırmaq üçün yenə də qapılar açıqdır, imkanlar var. Bundan istifadə etmək hər iki dövlətin xeyrinə olacaq”.

Günay Rəsulqızı

Gərginləşən münasibətlər: Rusiyadakı azərbaycanlılar üçün təhlükə var?