"Rusiya Müdafiə Nazirliyi ilə Çeçenistan arasında çəkişmələr..." - Kreml hesabata niyə susur?

Kreml Azərbaycan Hava Yolları (AZAL) təyyarəsinin qəzaya uğraması ilə bağlı Qazaxıstan Nəqliyyat Nazirliyinin ilkin məlumatını şərh etmir. Bu barədə dünən Rusiya prezidentinin mətbuat katibi Dmitri Peskov bildirib. “Bu, ilkin hesabatdır. Əlbəttə, bizim aidiyyəti qurumlarımız bunu böyük və lazımi diqqətlə öyrənəcəklər. Rusiya prezident administrasiyasının bu mövzuya münasibət bildirməsini mümkün hesab etmirik”, - Peskov deyib. Xatırladaq ki, Qazaxıstan Nəqliyyat Nazirliyinin açıqladığı hesabatda qeyd edilir ki, Azərbaycan Hava Yollarına məxsus “Embraer-190” təyyarəsi yer səthi ilə təmas edənədək xarici təsirə məruz qalıb.

Maraqlıdır, bir ay əvvəl “hesabatı gözləyirik” deyən Rusiya sözügedən məlumat dərc edildiyi halda indi niyə dirəniş sərgiləyir? 

Bununla bağlı Sfera.az-a açıqlama verən politoloq Fərhad Məmmədov deyib ki, Rusiyanın bu cür mövqe sərgiləməsi iki məsələ ilə izah oluna bilər:

“Birincisi, daxili məsələdir. Rusiya Müdafiə Nazirliyi, Çeçenistan Respublikasının rəhbərliyi, xüsusi xidmət orqanları bu qəzadan bir-birinə qarşı istifadə edirlər. Görünən odur ki, hər bir qrup öz media resurslarını işə salıb bununla bağlı manipulyasiyalar həyata keçirir. Ümumilikdə isə, Rusiyanın daxilində gedən proseslərə görə, AZAL-la bağlı məsələyə də bu cür mövqe sərgilənir. Bu da əlbəttə, Azərbaycan-Rusiya münasibətlərinə çox mənfi təsir göstərəcək”.

Müsahibimiz qeyd etdi ki, məsələnin beynəlmiləlləşdirilməsi artıq gündəm mövzusudur:

“Əgər Rusiya bunu ikitərəfli formata deyil, hesabatlar, dəlillər və.s kontekstinə çevirirsə, o zaman digər oyunçuların da burada olmasına təəccüblənməməlidir”.

Günay Rəsulqızı