“Yaxın Şərq Rivierası”... - Trampın Qəzza ilə bağlı planı mediaya SIZDI
Trampın Qəzza zolağına tam nəzarət, o cümlədən milyonlarla fələstinlinin qonşu ölkələrə məcburi köçürülməsi istiqamətində açıqlamaları dünya mediasında səs-küy yaradıb.
Sfera.az “Pravda” qəzetinə istinadən bildirir ki, Ağ Ev sahibinin bununla bağlı planının olduğunu bəlli olub. Qeyd edilib ki, “Fövqəladə rekonstruksiya planı” adlandırılan layihəyə əsasən, sözügedən ərazinin elit kurort bölgəsinə – “Yaxın Şərq Rivierası”na çevrilməsi nəzərdə tutulur. Digər tərəfdən, İordaniya və Misir artıq qaçqınların qəbulu ideyasını rədd edərək, bunu regionun sabitliyinə təhlükə adlandırıb.
Donald Tramp bildirib ki, ABŞ minaların təmizlənməsi, dağılmış binaların sökülməsi və yeni infrastrukturun yaradılması ilə bağlı məsuliyyəti öz üzərinə götürəcək:
“Qəzza yaşayış üçün yararsızdır. Lazım gələrsə, ABŞ ordusunu ora işləməyə və ya fələstinliləri çıxarmağa göndərə bilərik”.
Hələ 2024-cü ildə Tramp Benyamin Netanyahu ilə Qəzzanın”"əsas daşınmaz əmlak” kimi potensialını müzakirə edərək, otel tikintisi üçün sahilyanı ərazilərə diqqət yetirib. İsrailin Baş naziri planı dəstəkləyərək bunu “tarixi şans” adlandırıb. HƏMAS isə bu təşəbbüsü “xaos” kimi qiymətləndirib.
Nəşrin məlumatına görə, mütəxəssislər planın mümkünlüyünə şübhə edirlər. Şərqşünas Andrey Çuprıgin Trampın bəyanatlarını dalana dirənmiş Fələstin-İsrail münaqişəsini sarsıtmaq üçün hazırlanmış “şokedici PR hərəkəti” adlandırıb. Analitiklər qeyd edirlər ki, Trampın geosiyasəti, iqtisadiyyatı və gücü birləşdirən təşəbbüsü fələstinlilərin gələcəyini və Yaxın Şərqin tarazlığını sual altına qoyur. Bəziləri bunu “böyük sülh” üçün bir şans kimi görsə də, digərləri zorakılığın artacağını və humanitar fəlakətin olacağını proqnozlaşdırır. Bildirilir ki, burada həlledici rolu isə ərəb ölkələrinin mövqeyi oynayacaq.
Günay
