"Rusiya-Ukrayna danışıqları Brüssellə Vaşinqton arasında gərginliyi artıracaq" - ŞƏRH

Ötən gün İspaniyanın xarici işlər naziri Xose Manuel Albares bildirib ki, Ukrayna Rusiya ilə müharibədə məğlub olarsa, mövcudluğunu itirəcək. Onun sözlərinə görə, Ukrayna ilə bağlı qərarlar Kiyevin iştirakı olmadan verilə bilməz. “Eyni zamanda, Avropanın təhlükəsizliyi ilə bağlı məsələlər avropalılar olmadan həll edilməməlidir”, –  Albares vurğulayıb.

Nazirin çıxışı necə dəyərləndirilməlidir?

Bununla bağlı Sfera.az-a açıqlama verən siyasi şərhçi Kənan Novruzov deyib ki,  Albaresin fikirlərini əvvəllər rəsmi Kiyev də səsləndirib:

“Məsələ burasındadır ki, Ukraynanın gözlənilən danışıqlar masasında olmaması onun üçün çox ciddi təhdidlər vəd edir. Bunun Ukrayna üçün nəticələri çox ağır ola bilər. Nazirin dediklərindən belə qənaətə gəlmək olar ki, Avropa mümkün danışıqların ancaq ABŞ-nin vasitəçiliyi ilə baş tutmasından və Avropa İttifaqının (Aİ) kənarda qalacağından narahatdır. Bu, Aİ və ABŞ arasında müharibə ilə bağlı fikir ayrılığının olmasının təzahürüdür. Avropada başa düşürlər ki, ABŞ Ukraynanı onun maraqlarına uyğun olmayan şərtlərlə danışıqlar masası arxasına otuzdurmaq istəyir”.

Müsahibimiz Aİ-nin bunda maraqlı olmadığını vurğulayıb:

“Çünki gələcəkdə Avropa ölkələri, xüsusilə Rusiya ilə qonşu olanlar üçün təhlükə yarana bilər. İndidən təxmin etmək olar ki, Brüssellə Vaşinqton arasında gərginlik artacaq. Mümkün danışıqlarda Aİ masa arxasında olmasa, yeni böhranlar yarana bilər”.

Günay Rəsulqızı